ᱠᱟᱥᱟᱵᱷᱩ
ᱠᱟᱥᱟᱵᱷᱩ ᱫᱚ ᱠᱮᱨᱟᱞᱟ ᱨᱮᱭᱟᱜ ᱛᱤ-ᱛᱮᱧ ᱨᱮ ᱵᱮᱵᱷᱟᱨᱚᱜ ᱠᱟᱱ ᱢᱤᱫ ᱴᱮᱠᱱᱤᱠ ᱠᱟᱱᱟ, ᱡᱟᱦᱟᱸ ᱨᱮ ᱞᱩᱢᱟᱹᱝ ᱟᱨ ᱥᱩᱛᱟᱹᱢ ᱞᱩᱜᱽᱲᱤ ᱪᱮᱛᱟᱱ ᱨᱮ ᱟᱲᱮ ᱜᱟᱨ ᱟᱨ ᱰᱤᱡᱟᱭᱤᱱ ᱵᱮᱱᱟᱣ ᱞᱟᱹᱜᱤᱫ ᱥᱳᱱᱟ ᱥᱮ ᱨᱩᱯᱟᱹ ᱨᱮᱭᱟᱜ ᱟᱹᱰᱤ ᱱᱟᱱᱦᱟ ᱥᱩᱛᱟᱹᱢ ᱛᱮᱧ ᱨᱮ ᱵᱮᱵᱷᱟᱨᱚᱜᱼᱟ ᱾ ᱱᱚᱣᱟ ᱴᱮᱠᱱᱤᱠ ᱫᱚ ᱛᱟᱭᱚᱢ ᱛᱮ ᱥᱤᱧᱚᱛ ᱨᱮᱭᱟᱜ ᱵᱟᱹᱲᱛᱤ ᱦᱟᱹᱴᱤᱧ ᱨᱮ ᱯᱟᱥᱱᱟᱣ ᱮᱱᱟ ᱟᱨ ᱠᱟᱥᱟᱵᱷᱩ ᱴᱮᱠᱱᱤᱠ ᱫᱚ ᱜᱚᱴᱟ ᱥᱤᱧᱚᱛ ᱨᱮ ᱮᱴᱟᱜ ᱟᱭᱢᱟ ᱞᱩᱜᱽᱲᱤ ᱠᱚ ᱞᱟᱹᱜᱤᱫ ᱦᱚᱸ ᱩᱛᱱᱟᱹᱣ ᱮᱱᱟ ᱾ ᱮᱛᱚᱢ ᱥᱤᱧᱚᱛᱤᱭᱟᱹ ᱯᱚᱱᱚᱛ ᱠᱮᱨᱟᱞᱟ ᱠᱷᱚᱱ ᱮᱦᱚᱵ ᱟᱠᱟᱱ ᱠᱟᱥᱟᱵᱷᱩ ᱟᱲᱮ ᱥᱟᱶ ᱯᱩᱸᱰ ᱥᱮ ᱚᱯᱷ-ᱦᱣᱟᱭᱤᱴ ᱥᱩᱛᱟᱹᱢ ᱞᱩᱜᱽᱲᱤ ᱫᱚ ᱱᱤᱛᱚᱜ ᱠᱮᱨᱟᱞᱟ ᱥᱟᱹᱲᱤ ᱧᱩᱛᱩᱢ ᱛᱮ ᱧᱩᱛᱩᱢᱟᱱᱟ, ᱡᱟᱦᱟᱸ ᱫᱚ ᱠᱟᱥᱟᱵᱷᱩ ᱴᱮᱠᱱᱤᱠ ᱵᱮᱵᱷᱟᱨ ᱨᱮᱭᱟᱜ ᱯᱩᱭᱞᱩ ᱨᱩᱯ ᱢᱮᱱᱛᱮ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱾
ᱮᱛᱚᱦᱚᱵ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱥᱚᱞ ᱠᱟᱥᱟᱵᱷᱩ ᱫᱚ ᱥᱩᱛᱟᱹᱢ ᱥᱮ ᱞᱩᱢᱟᱹᱝ ᱞᱩᱜᱽᱲᱤ ᱨᱮ ᱟᱲᱮ ᱜᱟᱨ ᱥᱮ ᱰᱤᱡᱟᱭᱤᱱ ᱵᱮᱱᱟᱣ ᱞᱟᱹᱜᱤᱫ ᱱᱟᱱᱦᱟ ᱥᱳᱱᱟ ᱥᱮ ᱨᱩᱯᱟᱹ ᱥᱩᱛᱟᱹᱢ ᱵᱮᱵᱷᱟᱨ ᱠᱟᱛᱮ ᱛᱤ ᱛᱮ ᱵᱮᱱᱟᱣᱜ ᱠᱟᱱ ᱛᱟᱦᱮᱸᱫ ᱾ ᱱᱚᱣᱟ ᱫᱚ ᱵᱩᱫᱫᱷᱚ ᱡᱩᱜᱽ ᱠᱷᱚᱱ ᱮᱦᱚᱵ ᱟᱠᱟᱱᱟ ᱢᱮᱱᱛᱮ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ[᱑] ᱟᱨ ᱱᱤᱛ ᱦᱚᱸ ᱠᱮᱨᱟᱞᱟ ᱨᱮᱱ ᱦᱚᱲ, ᱢᱟᱞᱟᱭᱟᱞᱤ ᱠᱚ ᱦᱚᱛᱮᱛᱮ ᱦᱚᱨᱚᱜᱚᱜ ᱠᱟᱱᱟ ᱾ ᱱᱚᱣᱟ ᱫᱚ ᱛᱤᱨᱞᱟᱹ ᱟᱨ ᱠᱚᱲᱟ ᱵᱟᱱᱟᱨ ᱜᱮᱠᱚ ᱦᱚᱨᱚᱜᱟ, ᱟᱥᱚᱠᱟᱭ ᱛᱮ ᱯᱟᱨᱟᱵᱽ ᱠᱚ, ᱮᱱᱮᱡ ᱠᱚ, ᱟᱨ ᱵᱤᱥᱮᱥ ᱚᱠᱛᱚ ᱠᱚᱨᱮ ᱡᱮᱞᱮᱠᱟ ᱵᱟᱯᱞᱟ ᱟᱨ ᱯᱤᱨᱟᱱᱱᱟ ᱱᱟᱞ (ᱴᱚᱴᱷᱟᱠᱤᱭᱟᱹ ᱠᱮᱞᱮᱱᱰᱟᱨ ᱞᱮᱠᱟᱛᱮ ᱡᱟᱱᱟᱢ ᱢᱟᱦᱟᱸ) ᱨᱮ ᱾
ᱵᱤᱥᱩ ᱯᱟᱨᱟᱵᱽ ᱚᱠᱛᱚ ᱨᱮ, ᱠᱤᱥᱟᱹᱬᱚᱜ ᱟᱨ ᱞᱟᱦᱟᱱᱛᱤ ᱨᱮᱭᱟᱜ ᱪᱤᱱᱦᱟᱹ ᱞᱮᱠᱟᱛᱮ ᱟᱹᱨᱤᱪᱟᱹᱞᱤ ᱵᱤᱥᱩᱠᱠᱟᱱᱤ (ᱵᱟᱹᱛᱤ) ᱥᱩᱨ ᱨᱮ ᱢᱤᱫ ᱱᱟᱣᱟ ᱠᱟᱥᱟᱵᱷᱩ ᱞᱩᱜᱽᱲᱤ ᱫᱚᱦᱚ ᱨᱮᱭᱟᱜ ᱟᱹᱨᱤᱪᱟᱹᱞᱤ ᱢᱮᱱᱟᱜᱼᱟ ᱾ ᱢᱳᱦᱤᱱᱤᱭᱟᱴᱴᱟᱢ (ᱵᱤᱥᱱᱩ ᱟᱜ ᱛᱤᱨᱞᱟᱹ ᱨᱩᱯ ᱨᱮ ᱮᱱᱮᱡ) ᱞᱮᱠᱟᱱ ᱮᱱᱮᱡ ᱩᱫᱩᱜ ᱥᱚᱫᱚᱨ ᱚᱠᱛᱚ ᱨᱮ, ᱥᱮᱞᱮᱫᱤᱭᱟᱹ ᱠᱚᱫᱚ ᱮᱠᱮᱱ ᱠᱟᱥᱟᱵᱷᱩ ᱦᱚᱨᱚᱜ ᱜᱮᱠᱚ ᱦᱚᱨᱚᱜᱟ ᱾ ᱠᱟᱭᱠᱳᱴᱴᱤᱠᱟᱞᱤ ᱥᱮ ᱛᱷᱤᱨᱩᱵᱷᱟᱛᱷᱤᱨᱟᱠᱠᱟᱞᱤ[᱒] (ᱛᱷᱟᱭᱚ ᱨᱮᱭᱟᱜ ᱮᱱᱮᱡ) ᱞᱮᱠᱟᱱ ᱮᱱᱮᱡ ᱠᱚᱨᱮ ᱦᱚᱸ ᱛᱤᱨᱞᱟᱹ ᱮᱱᱮᱡᱤᱡ ᱠᱚ ᱠᱟᱥᱟᱵᱷᱩ ᱥᱟᱹᱲᱤ ᱠᱚ ᱟᱨ ᱟᱹᱨᱤᱪᱟᱹᱞᱤ ᱟᱨᱟᱜ ᱵᱞᱟᱣᱩᱡᱽ ᱠᱚ ᱦᱚᱨᱚᱜᱟ ᱾
ᱱᱚᱣᱟ ᱫᱚ ᱑᱙ ᱥᱟᱭ ᱥᱮᱨᱢᱟ ᱨᱮᱭᱟᱜ ᱮᱛᱚᱦᱚᱵ ᱥᱮᱫ ᱢᱚᱦᱟᱨᱟᱡᱟ ᱟᱵᱷᱟᱴᱴᱟᱢ ᱛᱷᱤᱨᱩᱱᱟᱞ ᱵᱟᱞᱟᱨᱟᱢᱟᱵᱷᱟᱨᱢᱟ ᱟᱨ ᱩᱱᱤᱨᱮᱱ ᱫᱚᱦᱚ ᱮᱨᱟ ᱩᱢᱢᱤᱱᱤ ᱛᱷᱟᱢᱵᱤ ᱦᱚᱛᱮᱛᱮ ᱠᱮᱨᱟᱞᱟ ᱛᱮ ᱟᱹᱜᱩ ᱞᱮᱱᱟ ᱢᱮᱱᱛᱮ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱾ 'ᱤᱥᱴᱟᱰᱤ ᱮᱱᱰ ᱰᱚᱠᱩᱢᱮᱱᱴᱤᱝ ᱚᱯᱷ ᱵᱟᱞᱟᱨᱟᱢᱟᱯᱩᱨᱟᱢ ᱥᱟᱨᱤᱡᱽ ᱮᱱᱰ ᱯᱷᱟᱭᱤᱱ ᱠᱚᱴᱚᱱ ᱯᱷᱮᱵᱽᱨᱤᱠᱥ' ᱞᱮᱠᱟᱛᱮ, ᱟᱹᱭᱩᱨᱤᱭᱟᱹ ᱠᱚᱫᱚ ᱛᱟᱢᱤᱞ ᱱᱟᱰᱩ ᱨᱮᱭᱟᱜ ᱱᱟᱜᱟᱨᱠᱳᱭᱮᱞ ᱠᱷᱚᱱ ᱥᱟᱞᱤᱭᱟ/ᱪᱟᱞᱤᱭᱟᱱ ᱜᱩᱴ ᱨᱮᱱ ᱦᱚᱲ ᱠᱚ ᱱᱮᱣᱛᱟ ᱟᱹᱜᱩ ᱠᱟᱛᱮ ᱟᱨ ᱯᱚᱱᱚᱛ ᱵᱷᱤᱛᱨᱤ ᱨᱮ ᱩᱱᱠᱩ ᱢᱟᱹᱱ ᱟᱨ ᱜᱚᱨᱚᱵᱽ ᱮᱢ ᱠᱟᱛᱮ ᱛᱤ-ᱛᱮᱧ ᱥᱤᱞᱯᱚ ᱨᱮ ᱟᱹᱰᱤ ᱢᱟᱨᱟᱝ ᱵᱚᱫᱚᱞ ᱠᱚ ᱟᱹᱜᱩ ᱞᱮᱫᱟ ᱾ ᱱᱚᱣᱟ ᱵᱚᱫᱚᱞ ᱛᱮ, ᱛᱮᱧ ᱦᱚᱲ ᱠᱚᱫᱚ ᱵᱟᱡᱟᱨ ᱠᱷᱚᱱ ᱟᱹᱜᱩ ᱟᱠᱟᱱ ᱥᱩᱛᱟᱹᱢ ᱵᱮᱵᱷᱟᱨ ᱠᱟᱛᱮ ᱛᱨᱟᱵᱷᱟᱱᱠᱳᱨ ᱨᱟᱡᱽᱜᱷᱟᱨᱚᱸᱡᱽ ᱞᱟᱹᱜᱤᱫ ᱛᱤ ᱛᱮ ᱛᱮᱧ ᱟᱠᱟᱱ ᱥᱩᱛᱟᱹᱢ ᱦᱚᱨᱚᱜ ᱠᱚ ᱵᱮᱱᱟᱣ ᱞᱮᱫᱟ ᱾ ᱰᱟᱪᱽ ᱟᱨ ᱯᱚᱨᱛᱩᱜᱤᱡᱽ ᱵᱟᱦᱨᱮ ᱫᱤᱥᱚᱢ ᱠᱩᱞᱤᱭᱟᱹ (exporters) ᱠᱚᱣᱟᱜ ᱢᱚᱱᱮ ᱚᱨ ᱠᱟᱛᱮ, ᱛᱤ-ᱛᱮᱧ ᱥᱟᱹᱲᱤ ᱠᱚᱫᱚ ᱟᱹᱰᱤ ᱞᱚᱜᱚᱱ ᱧᱩᱛᱩᱢᱟᱱ ᱮᱱᱟ ᱾
ᱥᱴᱟᱭᱤᱞ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱹᱨᱤᱪᱟᱹᱞᱤ ᱞᱮᱠᱟᱛᱮ ᱠᱟᱥᱟᱵᱷᱩ ᱫᱚ ᱥᱳᱱᱟ ᱥᱮ ᱨᱩᱯᱟᱹ ᱥᱩᱛᱟᱹᱢ ᱛᱟᱦᱮᱸ ᱠᱟᱱᱟ ᱢᱮᱱᱠᱷᱟᱱ ᱥᱳᱱᱟ ᱟᱨ ᱨᱩᱯᱟᱹ ᱨᱮᱭᱟᱜ ᱫᱟᱢ ᱠᱷᱟᱹᱛᱤᱨ ᱱᱚᱣᱟ ᱨᱮᱭᱟᱜ ᱵᱮᱵᱷᱟᱨ ᱠᱚᱢ ᱟᱠᱟᱱᱟ ᱾ ᱥᱳᱱᱟ ᱥᱮ ᱨᱩᱯᱟᱹ ᱨᱚᱝ ᱨᱮᱭᱟᱜ ᱟᱲᱮ ᱥᱟᱶ ᱢᱤᱫ ᱥᱟᱫᱷᱟᱨᱚᱱ ᱯᱩᱸᱰ ᱥᱮ ᱚᱯᱷ-ᱦᱣᱟᱭᱤᱴ ᱦᱚᱨᱚᱜ ᱫᱚ ᱟᱹᱨᱤᱪᱟᱹᱞᱤ ᱞᱮᱠᱟᱛᱮ ᱢᱟᱱᱟᱣᱚᱜᱼᱟ ᱟᱨ ᱱᱚᱣᱟ ᱫᱚ ᱠᱮᱨᱟᱞᱟ ᱥᱟᱹᱲᱤ ᱥᱮ ᱠᱮᱨᱟᱞᱟ ᱢᱩᱱᱰᱩ ᱠᱚ ᱢᱮᱛᱟᱜᱼᱟ ᱾ ᱠᱟᱥᱟᱵᱷᱩ ᱛᱮ ᱵᱮᱱᱟᱣ ᱟᱠᱟᱱ ᱦᱚᱨᱚᱜ ᱠᱚᱫᱚ ᱡᱤᱞᱤᱧ, ᱯᱩᱱ-ᱠᱚᱬ ᱞᱩᱜᱽᱲᱤ ᱨᱮᱭᱟᱜ ᱠᱩᱴᱤ ᱠᱟᱱᱟ ᱡᱟᱦᱟᱸ ᱫᱚ ᱢᱩᱱᱰᱩ ᱠᱚ ᱢᱮᱛᱟᱜᱼᱟ, ᱡᱟᱦᱟᱸ ᱫᱚ ᱦᱚᱲᱢᱚ ᱨᱮᱭᱟᱜ ᱞᱟᱛᱟᱨ ᱦᱟᱹᱴᱤᱧ ᱨᱮᱠᱚ ᱯᱚᱴᱚᱢᱟ, ᱟᱨ ᱵᱷᱮᱥᱴᱤ, ᱡᱟᱦᱟᱸ ᱫᱚ ᱪᱮᱛᱟᱱ ᱦᱚᱲᱢᱚ ᱨᱮᱠᱚ ᱯᱚᱴᱚᱢᱟ ᱾ ᱛᱤᱨᱞᱟᱹ ᱠᱚᱫᱚ ᱥᱟᱫᱷᱟᱨᱚᱱ ᱞᱮᱠᱟᱛᱮ ᱵᱷᱮᱥᱴᱤ ᱞᱟᱛᱟᱨ ᱨᱮ ᱢᱤᱫ ᱟᱨᱟᱜ, ᱦᱟᱹᱨᱭᱟᱹᱲ ᱥᱮ ᱥᱳᱱᱟ ᱨᱚᱝ ᱟᱹᱨᱤᱪᱟᱹᱞᱤ ᱵᱞᱟᱣᱩᱡᱽ ᱠᱚ ᱦᱚᱨᱚᱜᱟ ᱡᱚᱠᱷᱚᱱ ᱠᱚᱲᱟ ᱠᱚᱫᱚ ᱟᱫᱚᱢ ᱚᱠᱛᱚ ᱢᱤᱫ ᱯᱷᱚᱨᱢᱟᱞ ᱥᱟᱨᱴ ᱠᱚ ᱦᱚᱨᱚᱜᱟ ᱾
ᱢᱩᱱᱰᱩ ᱟᱨ ᱵᱷᱮᱥᱴᱤ ᱢᱮᱥᱟ ᱠᱟᱛᱮ ᱢᱤᱫ "ᱠᱟᱥᱟᱵᱷᱩ ᱥᱮᱴ" ᱥᱮ "ᱠᱟᱥᱟᱵᱷᱩ ᱥᱮᱴᱴᱩ" ᱨᱮᱭᱟᱜ ᱫᱟᱢ ᱫᱚ ᱥᱳᱱᱟ ᱟᱲᱮ ᱨᱮᱭᱟᱜ ᱚᱥᱟᱨ ᱞᱮᱠᱟᱛᱮ ᱵᱷᱮᱜᱟᱨᱚᱜᱼᱟ ᱾ ᱟᱲᱮ ᱠᱚᱫᱚ ᱚᱥᱟᱨ ᱨᱮ ᱓/᱔" ᱥᱮ ᱚᱱᱟ ᱠᱷᱚᱱ ᱠᱚᱢ ᱠᱷᱚᱱ, ᱖" ᱥᱮ ᱚᱱᱟ ᱠᱷᱚᱱ ᱵᱟᱹᱲᱛᱤ ᱫᱷᱟᱹᱵᱤᱡ ᱛᱟᱦᱮᱸ ᱫᱟᱲᱮᱭᱟᱜᱼᱟ ᱾
ᱴᱷᱟᱶ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱡᱩᱫᱤᱦᱚᱸ ᱮᱛᱚᱦᱚᱵ ᱫᱚ ᱠᱮᱨᱟᱞᱟ ᱠᱷᱚᱱ ᱠᱟᱱᱟ, ᱚᱠᱛᱚ ᱯᱟᱨᱚᱢᱚᱜ ᱥᱟᱶᱛᱮ ᱠᱟᱥᱟᱵᱷᱩ ᱫᱚ ᱜᱚᱴᱟ ᱥᱤᱧᱚᱛ ᱨᱮ ᱯᱟᱥᱱᱟᱣ ᱟᱠᱟᱱᱟ, ᱟᱥᱚᱠᱟᱭ ᱛᱮ ᱥᱩᱨ ᱨᱮᱭᱟᱜ ᱮᱛᱚᱢ ᱥᱤᱧᱚᱛᱤᱭᱟᱹ ᱯᱚᱱᱚᱛ ᱠᱚ ᱛᱟᱢᱤᱞ ᱱᱟᱰᱩ, ᱠᱚᱨᱱᱟᱴᱚᱠ, ᱟᱱᱫᱷᱨᱚ ᱯᱨᱚᱫᱮᱥ, ᱟᱨ ᱛᱮᱞᱮᱝᱜᱟᱱᱟ ᱨᱮ ᱾ ᱠᱮᱨᱟᱞᱟ ᱨᱮ, ᱚᱱᱠᱟᱱ ᱟᱹᱛᱩ ᱠᱚ ᱢᱮᱱᱟᱜᱼᱟ ᱡᱟᱦᱟᱸ ᱫᱚ ᱯᱩᱨᱟᱹᱯᱩᱨᱤ ᱞᱮᱠᱟᱛᱮ ᱠᱟᱥᱟᱵᱷᱩ ᱞᱩᱜᱽᱲᱤ ᱵᱮᱱᱟᱣ ᱨᱮ ᱟᱞᱟᱭ ᱟᱠᱟᱱᱟ ᱾ ᱚᱱᱟ ᱠᱚ ᱢᱩᱫᱽ ᱨᱮ ᱢᱤᱫ ᱧᱩᱛᱩᱢᱟᱱ ᱟᱹᱛᱩ ᱫᱚ ᱦᱩᱭᱩᱜ ᱠᱟᱱᱟ ᱳᱴᱴᱟᱯᱟᱞᱟᱢ ᱥᱩᱨ ᱨᱮᱭᱟᱜ ᱠᱩᱛᱷᱟᱢᱯᱟᱞᱞᱤ, ᱡᱟᱦᱟᱸ ᱫᱚ ᱛᱷᱨᱤᱥᱩᱨ ᱟᱨ ᱯᱟᱞᱟᱠᱠᱟᱰ ᱛᱟᱞᱟ ᱨᱮ ᱢᱮᱱᱟᱜᱼᱟ ᱾ ᱠᱩᱛᱷᱟᱢᱯᱟᱞᱞᱤ ᱨᱮ ᱛᱮᱧ ᱦᱚᱲ ᱠᱚᱣᱟᱜ ᱫᱮᱵᱷᱟᱝᱜᱟ ᱪᱮᱴᱴᱤᱭᱟᱨ ᱜᱩᱴ ᱫᱚ ᱕᱐᱐ ᱥᱮᱨᱢᱟ ᱢᱟᱲᱟᱝ ᱠᱳᱪᱤᱱ ᱨᱮᱱ ᱢᱚᱦᱟᱨᱟᱡᱟ ᱦᱚᱛᱮᱛᱮ ᱠᱚᱨᱱᱟᱴᱚᱠ ᱠᱷᱚᱱ ᱠᱚ ᱟᱹᱜᱩ ᱞᱮᱫ ᱠᱚᱣᱟ ᱾[᱓] ᱜᱚᱴᱟ ᱟᱹᱛᱩ ᱨᱮᱱ ᱦᱚᱲ ᱜᱮ ᱠᱟᱥᱟᱵᱷᱩ ᱞᱩᱜᱽᱲᱤ ᱠᱚ ᱵᱮᱱᱟᱣᱟ, ᱟᱠᱚᱣᱟᱜ ᱵᱮᱱᱟᱣᱟᱜ ᱠᱚ ᱢᱤᱫ ᱴᱷᱮᱱ ᱠᱚ ᱡᱟᱣᱨᱟᱭᱟ, ᱟᱨ ᱢᱤᱫ ᱥᱮᱱᱴᱨᱟᱞᱟᱭᱤᱡᱽᱰ, ᱜᱩᱴ ᱢᱤᱞᱟᱹᱣ ᱵᱟᱡᱟᱨ ᱛᱟᱞᱟ ᱛᱮᱠᱚ ᱟᱹᱠᱷᱨᱤᱧᱟ ᱾
ᱱᱟᱦᱟᱜ ᱠᱟᱥᱟᱵᱷᱩ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱹᱨᱤᱪᱟᱹᱞᱤ ᱢᱩᱱᱰᱩ-ᱵᱷᱮᱥᱴᱤ [᱔] ᱫᱚ ᱚᱠᱛᱚ ᱥᱟᱶᱛᱮ ᱵᱚᱫᱚᱞ ᱟᱠᱟᱱᱟ ᱟᱨ ᱛᱤᱨᱞᱟᱹ ᱠᱚ ᱟᱥᱚᱞ ᱵᱟᱨ-ᱦᱟᱹᱴᱤᱧ ᱦᱚᱨᱚᱜ ᱵᱚᱫᱚᱞ ᱛᱮ ᱢᱤᱫ-ᱦᱟᱹᱴᱤᱧ ᱥᱟᱹᱲᱤ ᱦᱚᱨᱚᱜ ᱵᱟᱹᱲᱛᱤ ᱠᱚ ᱠᱩᱥᱤᱭᱟᱜᱼᱟ ᱾ ᱥᱟᱶᱛᱮ, ᱟᱥᱚᱞ ᱦᱚᱨᱚᱜ ᱠᱚᱨᱮ ᱫᱚ ᱥᱟᱯᱷᱟ ᱥᱳᱱᱟ ᱨᱮᱭᱟᱜ ᱟᱲᱮ ᱛᱟᱦᱮᱸ ᱠᱟᱱᱟ, ᱡᱚᱠᱷᱚᱱ ᱱᱟᱣᱟ ᱨᱩᱯ ᱠᱚᱨᱮ ᱫᱚ ᱥᱳᱱᱟ ᱥᱟᱶᱛᱮ ᱟᱨᱟᱜ, ᱦᱟᱹᱨᱭᱟᱹᱲ, ᱥᱟᱥᱟᱝ ᱮᱢᱟᱱ ᱨᱚᱝ ᱠᱚ ᱛᱟᱦᱮᱸᱱᱟ, ᱡᱟᱦᱟᱸ ᱛᱮ ᱱᱚᱣᱟ ᱠᱚ ᱟᱨᱦᱚᱸ ᱢᱚᱱᱮ ᱢᱩᱦᱤᱛᱟᱱ ᱧᱮᱞᱚᱜᱼᱟ ᱾ ᱯᱟᱣᱟᱨ ᱞᱩᱢ ᱦᱚᱸ ᱛᱤ-ᱛᱮᱧ ᱨᱮᱭᱟᱜ ᱴᱷᱟᱶ ᱮ ᱦᱟᱛᱟᱣᱮᱫᱟ ᱢᱮᱱᱠᱷᱟᱱ ᱢᱤᱥᱤᱱ ᱛᱮ ᱵᱮᱱᱟᱣ ᱟᱠᱟᱱ ᱞᱩᱜᱽᱲᱤ ᱨᱮᱭᱟᱜ ᱴᱮᱠᱥᱪᱟᱨ ᱫᱚ ᱟᱥᱚᱞᱟᱜ ᱠᱷᱚᱱ ᱵᱷᱮᱜᱟᱨ ᱜᱮᱭᱟ, ᱡᱩᱫᱤᱦᱚᱸ ᱟᱹᱰᱤ ᱵᱟᱹᱲᱛᱤ ᱯᱨᱚᱰᱟᱠᱥᱚᱱ ᱞᱟᱹᱜᱤᱫ ᱱᱚᱣᱟ ᱠᱚᱫᱚ ᱥᱟᱥᱛᱟ ᱜᱮᱭᱟ ᱾
ᱥᱟᱹᱠᱷᱭᱟᱹᱛ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ↑ "All About Kerala Kasavu Saree - Its Varieties And More". Utsavpedia (in ᱟᱢᱮᱨᱤᱠᱟᱱ ᱟᱝᱜᱽᱨᱮᱡᱤ). 2017-02-27. Retrieved 2019-07-30.
- ↑ "Kaikotti Kali, Thiruvathirakali, Folk Dance, Kaikotti kali Dance of Kerala". www.onamfestival.org. Retrieved 2019-07-30.
- ↑ George, Anubha (6 October 2018). "For 500 years, a Kannadiga community of weavers has produced Kerala's iconic white and gold saree". Scroll.in. Archived from the original on 1 July 2021. Retrieved 1 July 2021.
- ↑ "Kerala Kasavu". external. Archived from the original on 2021-04-11. Retrieved 2019-10-03.