ᱰᱟᱸᱰᱵᱩᱥ
ᱰᱟᱸᱰᱵᱩᱥ ᱫᱚ ᱳᱰᱤᱥᱟ ᱯᱚᱱᱚᱛ ᱨᱮᱭᱟᱜ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮᱭᱟᱜ ᱵᱟᱵᱚᱱᱜᱷᱟᱹᱴᱤ ᱴᱚᱴᱷᱟ ᱨᱮ ᱢᱮᱱᱟᱜ ᱢᱤᱫ ᱟᱹᱛᱩ ᱠᱟᱱᱟ, ᱡᱟᱦᱟᱸ ᱫᱚ ᱚᱞ ᱜᱩᱨᱩ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱡᱟᱱᱟᱢ ᱟᱹᱛᱩ ᱞᱮᱠᱟᱛᱮ ᱵᱟᱰᱟᱭᱚᱜᱼᱟ ᱾[᱑] ᱱᱚᱣᱟ ᱫᱚ ᱜᱟᱹᱬᱫᱟᱹ ᱯᱤᱲ ᱛᱟᱹᱨᱤ ᱨᱮ ᱦᱤᱡᱩᱜᱼᱟ ᱟᱨ ᱢᱟᱬᱟᱝ ᱫᱚ ᱵᱷᱚᱸᱡᱽ ᱨᱟᱡᱟ ᱠᱚᱣᱟᱜ ᱥᱟᱥᱚᱱ ᱨᱮ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱟᱹᱛᱩ ᱫᱚ ᱨᱟᱭᱨᱚᱝᱯᱩᱨ ᱛᱷᱟᱱᱟ ᱛᱟᱹᱨᱤ ᱨᱮ ᱢᱮᱱᱟᱜᱼᱟ, ᱟᱨ ᱱᱚᱣᱟ ᱫᱚ ᱰᱟᱦᱟᱨᱰᱤ ᱧᱩᱛᱩᱢ ᱛᱮᱦᱚᱸ ᱵᱟᱰᱟᱭᱚᱜ ᱜᱮᱭᱟ ᱾ ᱵᱷᱚᱸᱡᱽ ᱨᱟᱡᱟ ᱠᱚᱫᱚ ᱢᱟᱬᱟᱝ ᱫᱚ ᱱᱚᱣᱟ ᱴᱚᱴᱷᱟ ᱨᱮ ᱟᱹᱰᱤ ᱫᱟᱲᱮᱭᱟᱱ ᱠᱚ ᱛᱟᱦᱮᱸ ᱠᱟᱱᱟ, ᱟᱨ ᱟᱯᱱᱟᱨᱟᱜ ᱫᱤᱥᱚᱢ ᱞᱮᱠᱟᱛᱮ ᱠᱚ ᱪᱟᱞᱟᱣᱮᱫ ᱛᱟᱦᱮᱸᱱ ᱾ ᱵᱷᱟᱨᱚᱛ ᱯᱷᱩᱨᱜᱟᱹᱞ ᱮᱱ ᱛᱟᱭᱚᱢ ᱦᱚᱸ ᱵᱷᱚᱸᱡᱽ ᱫᱚ ᱟᱞᱟᱜ ᱨᱟᱡᱽ ᱜᱮ ᱛᱟᱦᱮᱸ ᱠᱟᱱᱟ, ᱢᱮᱱᱠᱷᱟᱱ ᱑᱙᱔᱙ ᱥᱟᱹᱦᱤᱛ ᱨᱮ ᱳᱰᱤᱥᱟ ᱯᱚᱱᱚᱛ ᱨᱮ ᱢᱮᱥᱟ ᱮᱱᱟ ᱟᱨ ᱢᱤᱫ ᱦᱚᱱᱚᱛ ᱵᱮᱱᱟᱣ ᱮᱱᱟ ᱾ ᱢᱟᱬᱟᱝ ᱫᱚ ᱱᱚᱸᱰᱮ ᱫᱷᱩᱨᱩᱣᱟᱹ ᱡᱟᱹᱛᱤ ᱨᱮᱱ ᱦᱚᱲ ᱵᱟᱹᱲᱛᱤ ᱠᱚ ᱛᱟᱦᱮᱸ ᱠᱟᱱᱟ, ᱢᱮᱱᱠᱷᱟᱱ ᱵᱷᱚᱸᱡᱽ ᱨᱟᱡᱟ ᱵᱟᱠᱚ ᱢᱟᱱᱟᱣ ᱞᱮᱫᱮ ᱠᱷᱟᱹᱛᱤᱨ ᱩᱱᱠᱩ ᱫᱚ ᱚᱸᱰᱮ ᱠᱷᱚᱱ ᱠᱚ ᱞᱟᱜᱟ ᱠᱮᱫ ᱠᱚᱣᱟ ᱾
ᱱᱟᱜᱟᱢ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱰᱟᱸᱰᱵᱩᱥ ᱨᱮᱹᱱ ᱵᱟᱥᱠᱮ ᱦᱚᱲ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱰᱟᱦᱟᱨᱰᱤ ᱠᱷᱚᱱ ᱫᱷᱩᱨᱣᱟᱹ ᱠᱚ ᱧᱤᱨ ᱮᱱ ᱛᱟᱭᱚᱢ ᱫᱚ ᱵᱟᱥᱠᱮ ᱦᱚᱲ ᱠᱚᱠᱚ ᱵᱚᱥᱠᱚᱛ ᱞᱮᱱᱟ ᱾ ᱰᱤᱦᱤ ᱵᱟᱲᱜᱮ ᱵᱟᱲᱟ ᱠᱟᱛᱮ ᱵᱚᱸᱜᱟ ᱵᱩᱨᱩ ᱠᱚᱠᱚ ᱛᱤᱸᱜᱩ ᱠᱮᱴᱮᱡ ᱞᱮᱫ ᱠᱚᱣᱟ ᱾ ᱪᱟᱥᱵᱟᱥ ᱨᱮ ᱵᱷᱟᱹᱜᱤ ᱟᱨᱡᱟᱣ ᱤᱭᱟᱹᱛᱮ ᱠᱟᱹᱯᱤ ᱵᱩᱨᱩ ᱠᱷᱚᱱ ᱫᱟᱜ ᱯᱟᱴᱟᱱ ᱨᱮᱭᱟᱜ ᱠᱚ ᱫᱤᱲᱟᱹᱢᱩᱲ ᱞᱮᱫᱟ ᱾ ᱠᱟᱹᱯᱤ ᱵᱩᱨᱩ ᱟᱲᱮ ᱠᱚᱨᱮ ᱜᱚᱴᱟ ᱫᱟᱜ ᱯᱟᱴᱟᱱ ᱞᱟᱹᱜᱤᱫ ᱠᱚ ᱱᱟᱞᱟ ᱞᱮᱜ-ᱟ ᱾ ᱢᱮᱱᱠᱷᱟᱱ ᱠᱟᱹᱯᱤ ᱵᱩᱨᱩ ᱵᱚᱸᱜᱟ ᱱᱚᱣᱟ ᱫᱚ ᱵᱟᱭ ᱥᱟᱦᱟᱣ ᱞᱮᱫᱟ ᱟᱨ ᱵᱟᱥᱠᱮ ᱦᱚᱲ ᱠᱚ ᱟᱹᱰᱤ ᱜᱟᱱ ᱱᱟᱲᱟ ᱯᱤᱲᱟᱹ ᱠᱚ ᱧᱟᱢ ᱠᱮᱫᱟ ᱾ ᱚᱱᱟᱛᱮ ᱩᱱᱠᱩ ᱫᱚ ᱢᱟᱺᱡᱷᱤ ᱢᱟᱯᱟᱧᱡᱤ ᱠᱟᱹᱢᱤ ᱟᱨ ᱵᱚᱸᱜᱟ ᱵᱳᱨᱳ ᱠᱟᱹᱢᱤ ᱠᱚ ᱵᱟᱹᱜᱤ ᱥᱟᱶ ᱥᱟᱶᱛᱮ ᱟᱹᱛᱩ ᱫᱤᱥᱚᱢ ᱦᱚᱸ ᱠᱚ ᱵᱟᱹᱜᱤᱭᱟᱫ ᱛᱟᱦᱮᱸᱱ ᱾ ᱚᱱᱟ ᱛᱟᱭᱚᱢ ᱢᱩᱨᱢᱩ ᱦᱚᱲ ᱠᱚ ᱰᱟᱸᱰᱵᱩᱥ ᱟᱹᱛᱩ ᱨᱮᱠᱚ ᱵᱚᱥᱠᱚᱛ ᱞᱮᱱᱟ ᱾
ᱰᱟᱸᱰᱵᱩᱥ ᱨᱮᱹᱱ ᱢᱩᱨᱢᱩ ᱦᱚᱲ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱰᱟᱸᱰᱵᱩᱥ ᱨᱮᱹᱱ ᱢᱩᱨᱢᱩ ᱦᱚᱲ ᱠᱚᱫᱚ ᱴᱤᱠᱟᱹ ᱢᱩᱨᱢᱩ ᱦᱚᱲ ᱠᱟᱱᱟ ᱠᱚ ᱾ ᱱᱩᱠᱩ ᱨᱤᱱ ᱦᱟᱯᱲᱟᱢ ᱠᱚᱫᱚ ᱮᱱᱟᱝ ᱵᱤᱦᱟᱨ (ᱱᱤᱛ ᱡᱷᱟᱨᱠᱷᱟᱸᱰ) ᱨᱮᱭᱟᱜ ᱥᱤᱝ ᱵᱷᱩᱢ ᱦᱚᱱᱚᱛ ᱨᱮᱭᱟᱜ ᱨᱟᱡᱽᱱᱚᱜᱚᱨ ᱵᱚᱱᱚᱛ ᱨᱮᱭᱟᱜ 'ᱨᱚᱞᱟ' ᱟᱹᱛᱩ ᱠᱷᱚᱱ ᱦᱮᱡ ᱞᱮᱱᱟ, ᱡᱟᱦᱟᱸ ᱫᱚ ᱨᱩᱥᱤᱠ ᱨᱚᱞᱟ ᱦᱚᱸ ᱠᱚ ᱢᱮᱛᱟᱜ-ᱟ ᱟᱨ ᱱᱤᱛᱚᱜ ᱠᱩᱪᱩᱝ ᱯᱤᱲ ᱛᱟᱹᱨᱤ ᱨᱮ ᱢᱮᱱᱟᱜ-ᱟ ᱾ ᱯᱩᱸᱰᱤᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱟᱯᱟᱛ ᱨᱮᱹᱱ ᱜᱚᱲᱚᱢ ᱦᱟᱲᱟᱢ ᱵᱟᱹᱡᱽᱱᱟᱛᱷ(ᱵᱟᱹᱡᱟᱹᱜ) ᱱᱚᱣᱟ ᱵᱷᱚᱸᱡᱽ ᱫᱤᱥᱚᱢ ᱛᱮ ᱦᱮᱡ ᱞᱮᱱᱟᱭ ᱟᱨ ᱰᱟᱸᱰᱵᱩᱥ ᱨᱮᱭᱟᱜ ᱜᱩᱲᱭᱟᱹ ᱜᱟᱰᱟ ᱫᱷᱟᱨᱮ ᱨᱮ ᱵᱚᱥᱠᱚᱛ ᱞᱮᱱᱟᱭ ᱾ ᱵᱚᱪᱷᱚᱨ ᱫᱤᱱ ᱜᱮ ᱜᱟᱰᱟ ᱫᱟᱜ ᱛᱮᱠᱚ ᱵᱟᱱ ᱮᱱ ᱠᱷᱟᱱ ᱜᱷᱩᱴᱩ ᱧᱚᱜ ᱥᱮᱱ ᱠᱚ ᱩᱪᱟᱹᱲ ᱮᱱᱟ, ᱚᱱᱟ ᱜᱮ ᱱᱤᱛᱚᱜ ᱫᱚ ᱰᱟᱸᱰᱵᱩᱥ ᱪᱮ ᱰᱟᱦᱟᱨᱰᱤ ᱢᱮᱱᱛᱮ ᱵᱤᱠᱟᱹᱣ ᱟᱠᱟᱱᱟ ᱾
ᱰᱟᱸᱰᱵᱩᱥ ᱵᱮᱲᱦᱟᱭ ᱛᱮᱭᱟᱜ ᱟᱹᱛᱩ ᱫᱤᱥᱚᱢ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱰᱟᱦᱟᱨᱰᱤ ᱟᱹᱛᱩ ᱪᱮᱛᱟᱱ ᱛᱮ ᱫᱚ ᱴᱟᱴᱟᱱᱚᱜᱚᱨ ᱥᱚᱲᱚᱠ ᱮᱛᱚᱢ ᱠᱚᱧᱮ ᱛᱮ ᱥᱮᱱ ᱟᱠᱟᱱᱟ ᱾ ᱰᱟᱦᱟᱨᱰᱤ ᱠᱷᱚᱱ ᱮᱛᱚᱢ ᱥᱮᱦᱮᱫ ᱕ ᱠᱤᱞᱚᱢᱤᱴᱚᱨ ᱥᱟᱺᱜᱤᱧ ᱨᱮ ᱨᱟᱭᱨᱚᱝᱯᱩᱨ, ᱒ ᱠᱤᱞᱚᱢᱤᱴᱚᱨ ᱥᱟᱺᱜᱤᱧ ᱨᱮ ᱯᱩᱨᱱᱟᱹᱯᱟᱹᱱᱤ ᱟᱨ ᱱᱟᱥᱮ ᱥᱟᱢᱟᱝ ᱱᱟᱠᱷᱟ ᱨᱮ ᱫᱚ ᱤᱪᱟᱹᱜ ᱜᱷᱩᱴᱩ ᱥᱩᱯᱩᱨ ᱥᱩᱯᱩᱨ ᱾ ᱜᱟᱺᱵᱷᱟᱹᱨᱤᱭᱟᱹ ᱫᱚ ᱥᱚᱲᱚᱠ ᱪᱮᱛᱟᱱ ᱨᱮᱜᱮ ᱠᱚᱧᱮ ᱱᱟᱠᱷᱟ ᱓ ᱠᱤᱞᱚᱢᱤᱴᱚᱨ ᱥᱟᱺᱜᱤᱧ ᱨᱮ ᱢᱮᱱᱟᱜ-ᱟ ᱾ ᱯᱟᱪᱷᱮ ᱱᱟᱠᱷᱟ ᱨᱮᱭᱟᱜ ᱟᱹᱛᱩ ᱫᱚ ᱯᱩᱠᱷᱩᱨᱤᱭᱟᱹ, ᱱᱟᱥᱮ ᱮᱛᱚᱢ ᱥᱮᱦᱮᱫ ᱨᱮᱫᱚ ᱯᱟᱛᱮᱯᱟᱹᱱᱤ, ᱥᱟᱢᱟᱝ ᱥᱮᱦᱮᱫ ᱨᱮ ᱫᱚ ᱢᱮᱱᱟᱜ-ᱟ ᱠᱷᱚᱲᱵᱚᱸᱫ ᱟᱨ ᱜᱩᱸᱰᱩᱨᱤᱭᱟᱹ ᱟᱹᱛᱩ ᱥᱩᱯᱩᱨ ᱥᱩᱯᱩᱨ ᱓ ᱠᱤᱞᱚᱢᱤᱴᱚᱨ ᱥᱟᱺᱜᱤᱧ ᱨᱮ ᱾ ᱤᱪᱟᱹᱜ ᱜᱷᱩᱴᱩ ᱫᱚ ᱜᱩᱲᱭᱟᱹ ᱜᱟᱰᱟ ᱱᱤᱭᱟᱹ ᱥᱟᱦᱟ ᱟᱨ ᱠᱷᱚᱲᱵᱚᱸᱫᱽ ᱟᱨ ᱜᱩᱸᱰᱩᱸᱨᱤᱭᱟᱹ ᱫᱚ ᱜᱟᱰᱟ ᱦᱟᱱᱟ ᱥᱟᱦᱟ ᱾ ᱜᱩᱲᱭᱟᱹ ᱜᱟᱰᱟ ᱫᱚ ᱮᱛᱚᱢ ᱠᱷᱚᱱ ᱠᱚᱧᱮ ᱥᱮᱦᱮᱫ ᱥᱮᱱ ᱟᱹᱛᱩ ᱠᱟᱛᱮ ᱜᱟᱺᱵᱷᱟᱹᱨᱤᱭᱟᱹ ᱥᱩᱨ ᱥᱩᱨ ᱛᱮ ᱯᱟᱪᱷᱮ ᱱᱟᱠᱷᱟ ᱥᱮᱱ ᱞᱤᱸᱡᱤ ᱤᱫᱤᱭᱟ ᱠᱟᱱᱟ ᱾ ᱟᱹᱛᱩ ᱨᱮᱭᱟᱜ ᱠᱚᱧᱮ ᱱᱟᱠᱷᱟ ᱠᱩᱞᱦᱤ ᱢᱩᱪᱟᱹᱫ ᱨᱮᱫᱚ ᱢᱮᱱᱟᱜ-ᱟ "ᱠᱟᱹᱯᱤ ᱵᱩᱨᱩ" ᱾ ᱱᱚᱣᱟ ᱠᱟᱯᱤ ᱵᱩᱨᱩ ᱨᱮᱹᱱ ᱵᱚᱸᱜᱟ ᱵᱤᱫᱩ ᱟᱨ ᱪᱟᱸᱫᱟᱱ ᱛᱤᱠᱤᱱᱟᱜ ᱟᱸᱫᱮ ᱩᱫᱩᱜ ᱫᱟᱲᱮ ᱛᱮᱜᱮ ᱯᱩᱸᱰᱤᱛ ᱨᱟᱹᱜᱷᱩ ᱢᱩᱨᱢᱩ ᱚᱞ ᱫᱚᱭ ᱧᱟᱢ ᱞᱮᱜ-ᱟ ᱾
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ↑ "Pandit Raghunath Murmu". Archived from the original on 28 July 2012. Retrieved 17 May 2025.