ᱢᱟᱞᱩᱴᱤ
ᱢᱟᱞᱩᱴᱤ | |
|---|---|
ᱟᱹᱛᱩ | |
ᱢᱟᱞᱩᱴᱤ ᱨᱮᱭᱟᱜ ᱢᱚᱱᱫᱤᱨ ᱠᱚ | |
ᱢᱟᱞᱩᱴᱤ ᱨᱮᱭᱟᱜ ᱤᱱᱴᱟᱨᱮᱠᱴᱤᱵᱷ ᱢᱮᱯ | |
| ᱫᱤᱥᱚᱢ | ᱥᱤᱧᱚᱛ |
| ᱯᱚᱱᱚᱛ | ᱡᱷᱟᱨᱠᱷᱚᱸᱰ |
| ᱦᱚᱱᱚᱛ | ᱫᱩᱢᱠᱟᱹ ᱦᱚᱱᱚᱛ |
| ᱚᱠᱛᱚ ᱴᱚᱴᱷᱟ | ᱭᱩ.ᱴᱤ.ᱥᱤ+5.30 (ᱥᱤᱧᱚᱛᱤᱭᱟᱹ ᱢᱟᱱᱚᱛ ᱚᱠᱛᱚ) |
ᱢᱟᱞᱩᱴᱤ (ᱥᱮ ᱢᱟᱞᱩᱛᱤ) ᱫᱚ ᱥᱤᱧᱚᱛ ᱨᱮᱭᱟᱜ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱫᱩᱢᱠᱟᱹ ᱦᱚᱱᱚᱛ ᱨᱮᱭᱟᱜ ᱫᱩᱢᱠᱟᱹ ᱪᱟᱸᱜᱟ ᱠᱷᱚᱸᱰ ᱨᱮ ᱢᱮᱱᱟᱜ ᱥᱤᱠᱟᱹᱨᱤᱯᱟᱲᱟ ᱥᱤ.ᱰᱤ. ᱵᱚᱱᱚᱛ ᱨᱮᱭᱟᱜ ᱢᱤᱫ ᱟᱹᱛᱩ ᱠᱟᱱᱟ᱾ ᱱᱚᱶᱟ ᱫᱚ ᱵᱟᱡᱽ ᱵᱚᱥᱚᱱᱛᱚ ᱨᱟᱡᱽᱵᱚᱝᱥᱚ ᱚᱠᱛᱚ ᱨᱮ ᱵᱮᱱᱟᱣ ᱞᱮᱱᱟ᱾ ᱱᱚᱶᱟ ᱴᱚᱴᱷᱟ ᱨᱮ ᱗᱒ ᱜᱚᱴᱟᱝ ᱢᱟᱨᱮ ᱢᱚᱱᱫᱤᱨ ᱢᱮᱱᱟᱜᱼᱟ, ᱡᱟᱦᱟᱸ ᱫᱚ ᱯᱟᱞ ᱨᱟᱡᱽᱵᱚᱝᱥᱚ ᱨᱤᱱ ᱨᱟᱡᱟ ᱠᱚᱣᱟᱜ ᱥᱢᱨᱤᱛᱤ ᱠᱟᱱᱟ᱾[᱑] ᱚᱱᱟ ᱠᱚᱨᱮ ᱫᱚ ᱨᱟᱢᱟᱭᱚᱬ ᱟᱨ ᱢᱚᱦᱟᱵᱷᱟᱨᱚᱛ ᱥᱟᱶᱛᱮ ᱦᱤᱱᱫᱩ ᱯᱩᱨᱟᱱ ᱨᱮᱭᱟᱜ ᱟᱭᱢᱟ ᱪᱤᱛᱟᱹᱨ ᱠᱚ ᱩᱫᱩᱜ ᱥᱚᱫᱚᱨ ᱟᱠᱟᱱᱟ᱾ ᱢᱟᱞᱩᱴᱤ ᱫᱚ ᱫᱤᱱᱟᱹᱢ ᱥᱮᱨᱢᱟ ᱠᱟᱹᱞᱤ ᱯᱩᱡᱟᱹ ᱨᱮ ᱢᱤᱫᱴᱟᱹᱝ ᱠᱟᱰᱟ ᱟᱨ ᱢᱤᱫᱴᱟᱹᱝ ᱵᱷᱤᱰᱤ ᱥᱟᱶᱛᱮ ᱑᱐᱐ ᱠᱷᱚᱱ ᱵᱟᱹᱲᱛᱤ ᱢᱮᱨᱚᱢ ᱠᱚ ᱵᱟᱹᱞᱤ ᱮᱢᱚᱜ ᱞᱟᱹᱜᱤᱫ ᱵᱟᱰᱟᱭᱚᱜᱼᱟ᱾ ᱡᱤᱣᱤ ᱡᱤᱭᱟᱹᱞᱤ ᱟᱹᱭᱫᱟᱹᱨᱤ ᱜᱟᱶᱛᱟ ᱠᱚ ᱱᱚᱶᱟ ᱠᱟᱹᱢᱤ ᱫᱚ ᱟᱹᱰᱤ ᱠᱮᱴᱮᱡ ᱛᱮᱠᱚ ᱵᱤᱨᱩᱫᱽ ᱟᱠᱟᱫᱼᱟ᱾ ᱛᱮᱦᱮᱧ ᱢᱟᱞᱩᱴᱤ ᱫᱚ ᱢᱟᱨᱮ ᱢᱚᱱᱫᱤᱨ ᱠᱚᱨᱮᱱᱟᱜ ᱵᱮᱥ ᱫᱮᱠᱷᱵᱷᱟᱞ ᱵᱟᱝ ᱠᱷᱟᱹᱛᱤᱨ ᱟᱨ ᱯᱨᱟᱠᱨᱤᱛᱤᱠ ᱵᱤᱯᱚᱨᱡᱚᱭ ᱠᱷᱟᱹᱛᱤᱨ ᱵᱤᱯᱚᱫᱽ ᱨᱮ ᱢᱮᱱᱟᱜᱼᱟ᱾
ᱚᱛᱱᱚᱜ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]| ᱥᱟᱱᱛᱟᱲ ᱯᱟᱨᱜᱟᱱᱟ ᱠᱷᱚᱸᱰ ᱨᱮᱭᱟᱜ ᱫᱮᱣᱜᱷᱚᱨ, ᱫᱩᱢᱠᱟᱹ ᱟᱨ ᱡᱟᱢᱛᱟᱲᱟ ᱦᱚᱱᱚᱛ ᱨᱮᱭᱟᱜ ᱱᱟᱜᱟᱨ, ᱵᱟᱡᱟᱨ ᱟᱨ ᱴᱷᱟᱶ ᱠᱚ M: ᱢᱤᱣᱱᱤᱥᱤᱯᱟᱞᱤᱴᱤ, CT: ᱦᱚᱲ ᱞᱮᱠᱷᱟ ᱥᱚᱦᱚᱨ, R: ᱟᱹᱛᱩ/ᱵᱟᱡᱟᱨ ᱛᱟᱞᱢᱟ, D: ᱰᱮᱢ, ᱦᱩᱰᱤᱧ ᱢᱮᱯ ᱨᱮ ᱡᱟᱭᱜᱟ ᱠᱚᱢ ᱠᱷᱟᱹᱛᱤᱨ, ᱢᱟᱨᱟᱝ ᱢᱮᱯ ᱨᱮ ᱟᱥᱚᱞ ᱴᱷᱟᱶ ᱠᱚ ᱱᱟᱥᱮ ᱵᱷᱮᱜᱟᱨ ᱧᱮᱞ ᱫᱟᱲᱮᱭᱟᱜᱼᱟ |
ᱴᱷᱟᱶ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱢᱟᱞᱩᱴᱤ ᱫᱚ 24°09′40″N 87°40′29″E / 24.16111°N 87.67472°ECoordinates: 24°09′40″N 87°40′29″E / 24.16111°N 87.67472°E ᱨᱮ ᱢᱮᱱᱟᱜᱼᱟ᱾
ᱱᱳᱴ: ᱯᱩᱨᱟᱹ ᱥᱠᱨᱤᱱ ᱢᱮᱯ ᱫᱚ ᱟᱹᱰᱤ ᱱᱟᱯᱟᱭᱟ᱾ ᱢᱮᱯ ᱨᱮ ᱪᱤᱱᱦᱟᱹ ᱟᱠᱟᱱ ᱡᱚᱛᱚ ᱴᱷᱟᱶ ᱜᱮ ᱯᱩᱨᱟᱹ ᱥᱠᱨᱤᱱ ᱢᱮᱯ ᱨᱮ ᱞᱤᱝᱠ ᱟᱠᱟᱱᱟ ᱟᱨ ᱟᱞᱜᱟ ᱛᱮᱜᱮ ᱟᱡᱟᱜ ᱠᱩᱥᱤᱭᱟᱜ ᱮᱴᱟᱜ ᱥᱟᱠᱟᱢ ᱛᱮᱠᱚ ᱥᱮᱱ ᱫᱟᱲᱮᱭᱟᱜᱼᱟ᱾ ᱟᱨᱦᱚᱸ ᱪᱮᱫ ᱠᱚ ᱢᱮᱱᱟᱜᱼᱟ ᱧᱮᱞ ᱞᱟᱹᱜᱤᱫ ᱯᱩᱨᱟᱹ ᱥᱠᱨᱤᱱ ᱢᱮᱯ ᱢᱟᱨᱟᱝ ᱢᱮ – ᱨᱮᱞᱣᱮ ᱡᱚᱯᱚᱲᱟᱣ ᱠᱚ, ᱟᱨᱦᱚᱸ ᱟᱭᱢᱟ ᱥᱚᱲᱚᱠ ᱡᱚᱯᱚᱲᱟᱣ ᱠᱚ ᱟᱨ ᱚᱱᱠᱟ ᱜᱮ ᱟᱭᱢᱟ ᱧᱟᱢᱚᱜᱼᱟ᱾
ᱦᱚᱲ ᱞᱮᱠᱷᱟ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]᱒᱐᱑᱑ ᱨᱮᱭᱟᱜ ᱦᱚᱲ ᱞᱮᱠᱷᱟ ᱞᱮᱠᱟᱛᱮ; ᱢᱟᱞᱩᱴᱤ ᱨᱮ ᱜᱩᱴ ᱚᱲᱟᱜ ᱨᱮᱭᱟᱜ ᱮᱞᱠᱷᱟ ᱫᱚ ᱓᱒᱕ ᱟᱨ ᱜᱩᱴ ᱦᱚᱲ ᱮᱞ ᱫᱚ ᱑᱔᱖᱙ (ᱠᱚᱲᱟ ᱗᱖᱑, ᱠᱩᱲᱤ ᱗᱐᱘)᱾ ᱐-᱖ ᱥᱮᱨᱢᱟ ᱩᱢᱮᱨ ᱨᱤᱱ ᱜᱤᱫᱽᱨᱟᱹ ᱠᱚᱣᱟᱜ ᱮᱞᱠᱷᱟ ᱫᱚ ᱑᱖᱓ (ᱠᱚᱲᱟ ᱙᱓, ᱠᱩᱲᱤ ᱗᱐)᱾ ᱓᱖᱓ ᱦᱚᱲ (ᱠᱚᱲᱟ ᱑᱘᱙, ᱠᱩᱲᱤ ᱑᱗᱔) ᱫᱚ ᱞᱮᱠᱷᱟ ᱜᱟᱫᱮᱞ ᱡᱟᱹᱛᱤ (ᱮᱥ.ᱥᱤ) ᱨᱮ ᱟᱨ ᱕᱒ (ᱠᱚᱲᱟ ᱒᱓, ᱠᱩᱲᱤ ᱒᱙) ᱫᱚ ᱞᱮᱠᱷᱟ ᱜᱟᱫᱮᱞ ᱟᱹᱫᱤᱵᱟᱹᱥᱤ (ᱮᱥ.ᱴᱤ) ᱨᱮᱠᱚ ᱦᱤᱡᱩᱜᱼᱟ᱾
ᱡᱷᱟᱨᱠᱷᱚᱸᱰ ᱨᱮᱭᱟᱜ ᱥᱟᱱᱟᱢ ᱠᱷᱚᱱ ᱢᱟᱞᱩᱴᱤ ᱟᱹᱛᱩ ᱨᱮᱭᱟᱜ ᱥᱮᱪᱮᱫ ᱫᱚᱨ ᱫᱚ ᱰᱷᱮᱨ ᱜᱮᱭᱟ᱾ ᱒᱐᱑᱑ ᱥᱟᱞ ᱨᱮ, ᱡᱷᱟᱨᱠᱷᱚᱸᱰ ᱨᱮᱭᱟᱜ ᱥᱮᱪᱮᱫ ᱫᱚᱨ ᱖᱖.᱔᱑% ᱥᱟᱶ ᱛᱩᱞᱟᱹᱡᱚᱠᱷᱟ ᱞᱮᱠᱷᱟᱱ ᱢᱟᱞᱩᱴᱤ ᱟᱹᱛᱩ ᱨᱮᱭᱟᱜ ᱥᱮᱪᱮᱫ ᱫᱚᱨ ᱫᱚ ᱗᱕.᱔᱒% ᱛᱟᱦᱮᱸ ᱠᱟᱱᱟ᱾ ᱢᱟᱞᱩᱴᱤ ᱨᱮ ᱠᱚᱲᱟ ᱠᱚᱣᱟᱜ ᱥᱮᱪᱮᱫ ᱫᱚᱨ ᱫᱚ ᱘᱑.᱒᱙% ᱟᱨ ᱠᱩᱲᱤ ᱠᱚᱣᱟᱜ ᱥᱮᱪᱮᱫ ᱫᱚᱨ ᱫᱚ ᱖᱙.᱒᱘% ᱛᱟᱦᱮᱸ ᱠᱟᱱᱟ᱾[᱒]
ᱱᱟᱜᱟᱢ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱢᱟᱞᱩᱴᱤ ᱟᱹᱛᱩ ᱫᱚ ᱜᱮᱞᱢᱚᱬᱮ ᱥᱟᱭ ᱥᱮᱨᱢᱟ ᱨᱮ ᱱᱟᱱᱠᱟᱨ ᱨᱟᱡᱽ (ᱠᱷᱟᱡᱽᱱᱟ-ᱪᱷᱟᱲ ᱨᱟᱡᱚᱥᱛᱷᱤ) ᱨᱮᱭᱟᱜ ᱨᱟᱡᱽᱜᱟᱲ ᱞᱮᱠᱟᱛᱮ ᱧᱩᱛᱩᱢ ᱮ ᱦᱟᱢᱮᱴ ᱞᱮᱫᱼᱟ᱾ ᱱᱚᱶᱟ ᱨᱟᱡᱚᱥᱛᱷᱤ ᱫᱚ ᱜᱳᱣᱩᱲ (᱑᱔᱙᱕-᱑᱕᱒᱕) ᱨᱤᱱᱤᱡ ᱥᱩᱞᱛᱟᱱ ᱟᱞᱟᱣᱩᱫᱫᱤᱱ ᱦᱩᱥᱮᱱ ᱥᱟᱦ ᱦᱚᱛᱮᱛᱮ ᱠᱟᱴᱤᱜᱨᱟᱢ ᱟᱹᱛᱩ ᱨᱤᱱᱤᱡ ᱢᱤᱫ ᱵᱚᱥᱚᱱᱛᱚ ᱨᱟᱭ ᱮ ᱮᱢᱟᱫ ᱫᱮ ᱛᱟᱦᱮᱸᱫ᱾ ᱢᱤᱫ ᱨᱮᱸᱜᱮᱡ ᱵᱟᱵᱽᱬᱮᱭᱤᱡ ᱦᱚᱯᱚᱱ ᱵᱚᱥᱚᱱᱛᱚ ᱫᱚ ᱥᱩᱞᱛᱟᱱᱤᱡ ᱟᱹᱥᱩᱞ ᱵᱟᱡᱽ ᱪᱮᱬᱮ ᱥᱟᱵ ᱠᱟᱛᱮ ᱥᱩᱞᱛᱟᱱ ᱮ ᱨᱩᱣᱟᱹᱲ ᱮᱢᱟᱫ ᱫᱮᱭᱟ᱾ ᱚᱱᱟ ᱵᱟᱡᱽ ᱪᱮᱬᱮ ᱵᱚᱫᱚᱞ ᱛᱮ, ᱵᱚᱥᱚᱱᱛᱚ ᱫᱚ ᱨᱟᱡᱚᱥᱛᱷᱤ ᱠᱚ ᱮᱢᱟᱫ ᱫᱮᱭᱟ᱾ ᱚᱱᱟᱛᱮ, ᱨᱟᱡᱟ ᱫᱚ ᱨᱟᱡᱟ ᱵᱟᱡᱽ ᱵᱚᱥᱚᱱᱛᱚ ᱢᱮᱱᱛᱮ ᱠᱚ ᱢᱮᱛᱟᱭ ᱠᱟᱱ ᱛᱟᱦᱮᱸᱫ᱾ ᱵᱟᱡᱽ ᱵᱚᱥᱚᱱᱛᱚ ᱨᱟᱡᱽᱵᱚᱝᱥᱚ ᱨᱮᱭᱟᱜ ᱨᱟᱡᱽᱜᱟᱲ ᱫᱚ ᱰᱟᱢᱨᱟ ᱨᱮ ᱛᱟᱦᱮᱸ ᱠᱟᱱᱟ᱾ ᱛᱟᱭᱚᱢ ᱛᱮ ᱱᱚᱶᱟ ᱫᱚ ᱢᱟᱞᱩᱴᱤ ᱛᱮᱠᱚ ᱩᱪᱟᱹᱲ ᱞᱮᱫᱼᱟ᱾ ᱨᱟᱡᱽ ᱜᱷᱟᱨᱚᱸᱡᱽ ᱨᱤᱱ ᱦᱚᱲ ᱫᱚ ᱟᱹᱰᱤ ᱫᱷᱚᱨᱚᱢ ᱫᱚᱨᱚᱫᱤᱭᱟᱹ ᱠᱚ ᱛᱟᱦᱮᱸ ᱠᱟᱱᱟ᱾
ᱠᱟᱥᱤ ᱨᱮᱭᱟᱜ ᱥᱩᱢᱮᱨᱩ ᱢᱚᱴᱷ ᱨᱤᱱᱤᱡ ᱢᱤᱫ ᱫᱟᱱᱰᱤ ᱥᱚᱱᱱᱟᱥᱤ ᱭᱟᱜ ᱜᱚᱲᱚ ᱛᱮ ᱵᱚᱥᱚᱱᱛᱚ ᱢᱤᱫ ᱵᱟᱡᱽ ᱪᱮᱬᱮ ᱵᱚᱫᱚᱞ ᱛᱮ ᱨᱟᱡᱟᱭ ᱵᱮᱱᱟᱣ ᱮᱱᱟ ᱱᱚᱶᱟ ᱠᱟᱛᱷᱟ ᱫᱚ ᱟᱭᱢᱟ ᱜᱟᱱ ᱥᱟᱹᱨᱤ ᱜᱮᱭᱟ ᱪᱮᱫᱟᱜ ᱥᱮ ᱱᱚᱶᱟ ᱜᱷᱚᱴᱚᱱ ᱩᱭᱦᱟᱹᱨ ᱫᱚᱦᱚᱭ ᱞᱟᱹᱜᱤᱫ ᱵᱚᱥᱚᱱᱛᱚ ᱧᱩᱛᱩᱢ ᱢᱟᱬᱟᱝ ᱨᱮ 'ᱵᱟᱡᱽ' ᱟᱹᱲᱟᱹ ᱡᱚᱲᱟᱣ ᱟᱠᱟᱱᱟ᱾ ᱵᱟᱡᱽ ᱵᱚᱥᱚᱱᱛᱚ ᱧᱩᱛᱩᱢ ᱫᱚ ᱛᱩᱞᱟᱹᱡᱚᱠᱷᱟ ᱞᱮᱠᱟᱛᱮ ᱧᱩᱢᱟᱱ ᱜᱮᱭᱟ ᱪᱮᱫᱟᱜ ᱥᱮ ᱱᱚᱶᱟ ᱫᱚ ᱴᱚᱴᱷᱟᱠᱤᱭᱟᱹ ᱱᱟᱜᱟᱢ ᱟᱨ ᱥᱚᱨᱠᱟᱨᱤ ᱨᱮᱠᱳᱨᱰ ᱵᱟᱱᱟᱨ ᱨᱮᱜᱮ ᱧᱟᱢᱚᱜᱼᱟ᱾ ᱵᱟᱨᱟᱬᱟᱥᱤ ᱨᱮᱭᱟᱜ ᱥᱩᱢᱮᱨᱩ ᱢᱚᱴᱷ ᱨᱤᱱᱤᱡ ᱢᱩᱬᱩᱛ ᱥᱣᱟᱢᱤᱡᱤ ᱫᱚ,[᱓] ᱵᱚᱥᱚᱱᱛᱚ ᱭᱤᱡ ᱜᱩᱨᱩᱭ ᱛᱟᱦᱮᱸ ᱠᱟᱱᱟ᱾ ᱩᱱ ᱠᱷᱚᱱ ᱜᱮ ᱥᱩᱢᱮᱨᱩ ᱢᱚᱴᱷ ᱨᱤᱱᱤᱡ ᱢᱩᱬᱩᱛ ᱡᱟᱦᱟᱸᱭ ᱫᱚ ᱨᱟᱡᱽᱜᱩᱨᱩ ᱠᱚ ᱢᱮᱛᱟᱭᱟ, ᱩᱱᱤ ᱫᱚ ᱨᱟᱡᱟ ᱵᱟᱡᱽ ᱵᱚᱥᱚᱱᱛᱚ ᱨᱮᱱ ᱵᱚᱝᱥᱚ ᱠᱚᱨᱤᱱ ᱜᱩᱨᱩᱭ ᱦᱩᱭᱮᱱᱟ᱾ ᱛᱮᱦᱮᱧ ᱦᱚᱸ ᱵᱟᱨᱟᱬᱟᱥᱤ ᱨᱮᱭᱟᱜ ᱥᱩᱢᱮᱨᱩ ᱢᱚᱴᱷ ᱨᱤᱱᱤᱡ ᱨᱟᱡᱽᱜᱩᱨᱩ ᱫᱚ ᱥᱮᱨᱢᱟ ᱯᱤᱪᱷᱤ ᱢᱟᱞᱩᱴᱤ ᱨᱮ ᱠᱤᱪᱷᱩ ᱚᱠᱛᱚᱭ ᱠᱷᱟᱸᱰᱟᱣᱟ᱾
ᱢᱟᱞᱩᱴᱤ — ᱵᱟᱡᱽ ᱵᱚᱥᱚᱱᱛᱚ ᱨᱟᱡᱽᱵᱚᱝᱥᱚ ᱨᱮᱭᱟᱜ ᱨᱟᱡᱽᱜᱟᱲ — ᱪᱮᱫ ᱞᱮᱠᱟᱛᱮ ᱢᱤᱫ 'ᱢᱚᱱᱫᱤᱨ ᱱᱟᱜᱟᱨ' ᱵᱮᱱᱟᱣᱮᱱᱟ ᱚᱱᱟ ᱦᱚᱸ ᱢᱤᱫ ᱟᱹᱰᱤ ᱱᱟᱯᱟᱭ ᱠᱟᱹᱦᱱᱤ ᱠᱟᱱᱟ᱾ ᱨᱟᱡᱽᱢᱚᱦᱚᱞ ᱵᱮᱱᱟᱣ ᱵᱚᱫᱚᱞ ᱛᱮ, ᱨᱟᱡᱟ ᱠᱚᱫᱚ ᱢᱚᱱᱫᱤᱨ ᱠᱚ ᱵᱮᱱᱟᱣ ᱞᱮᱫᱼᱟ᱾ ᱱᱚᱶᱟ ᱨᱟᱡᱽᱵᱚᱝᱥᱚ ᱫᱚ ᱟᱭᱢᱟ ᱦᱟᱹᱴᱤᱧ ᱨᱮ (ᱛᱚᱨᱚᱯᱷ) ᱦᱟᱹᱴᱤᱧ ᱞᱮᱱᱟ, ᱢᱮᱱᱠᱷᱟᱱ ᱡᱚᱛᱚ ᱛᱚᱨᱚᱯᱷ ᱜᱮ ᱢᱤᱫ ᱦᱚᱲ ᱟᱨ ᱢᱤᱫ ᱦᱚᱲ ᱥᱟᱶ ᱦᱮᱯᱮᱨᱟᱣ ᱠᱟᱛᱮ ᱢᱚᱱᱫᱤᱨ ᱠᱚ ᱵᱮᱱᱟᱣ ᱤᱫᱤ ᱠᱮᱫᱼᱟ᱾ ᱢᱩᱪᱟᱹᱫ ᱨᱮ, ᱱᱚᱶᱟ ᱫᱚ ᱢᱤᱫ ᱚᱥᱟᱫᱷᱟᱨᱚᱱ ᱢᱚᱱᱫᱤᱨ ᱟᱹᱛᱩ ᱞᱮᱠᱟᱛᱮ ᱵᱮᱱᱟᱣᱮᱱᱟ᱾ ᱢᱚᱱᱫᱤᱨ ᱠᱚᱨᱮ ᱯᱨᱳᱴᱳ-ᱵᱟᱝᱞᱟ ᱛᱮ ᱚᱞ ᱟᱠᱟᱱ ᱚᱱᱚᱞ ᱠᱷᱚᱱ ᱵᱟᱰᱟᱭᱚᱜᱼᱟ ᱡᱮ ᱚᱱᱟ ᱠᱚᱫᱚ ᱛᱤᱨᱞᱟᱹ ᱠᱚᱣᱟᱜ ᱧᱩᱛᱩᱢ ᱛᱮ ᱧᱩᱢ ᱟᱠᱟᱱᱟ᱾
ᱟᱨ ᱢᱤᱫ ᱢᱚᱛ ᱞᱮᱠᱟᱛᱮ ᱢᱟᱞᱩᱴᱤ ᱟᱹᱛᱩ ᱨᱮᱭᱟᱜ ᱧᱩᱛᱩᱢ ᱫᱚ ᱯᱟᱞᱮᱱ ᱵᱟᱸᱠᱩᱲᱟ ᱨᱮᱱ ᱢᱚᱞᱞᱚ ᱨᱟᱡᱟ ᱠᱚᱣᱟᱜ ᱢᱚᱞᱞᱚᱦᱟᱴᱤ ᱠᱷᱚᱱ ᱦᱮᱡ ᱟᱠᱟᱱᱟ, ᱵᱤᱥᱱᱩᱯᱩᱨ ᱨᱮᱭᱟᱜ ᱱᱚᱶᱟ ᱴᱚᱴᱷᱟ ᱪᱮᱛᱟᱱ ᱨᱮ ᱟᱹᱭᱫᱟᱹᱨᱤ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱚᱠᱛᱚ ᱨᱮ ᱵᱟᱸᱠᱩᱲᱟ ᱨᱤᱱ ᱢᱚᱞᱞᱚ ᱨᱟᱡᱟ ᱠᱚᱣᱟᱜ ᱥᱟᱥᱚᱱ ᱨᱮ ᱛᱟᱦᱮᱸ ᱠᱟᱱ ᱱᱚᱶᱟ ᱴᱚᱴᱷᱟ ᱫᱚ ᱫᱟᱢᱤᱱ-ᱤ-ᱠᱳᱦ (ᱮᱛᱚᱢ ᱨᱮ ᱱᱤᱛᱚᱜᱟᱜ ᱯᱟᱠᱩᱲ᱾ ᱥᱟᱢᱟᱝ ᱨᱮ ᱵᱚᱨᱫᱷᱚᱢᱟᱱ, ᱠᱚᱧᱮ ᱨᱮ ᱢᱮᱫᱤᱱᱤᱯᱩᱨ ᱟᱨ ᱯᱟᱪᱮ ᱨᱮ ᱪᱷᱚᱴᱟᱱᱟᱜᱽᱯᱩᱨ ᱞᱩᱜᱷᱩᱵᱩᱨᱩ ᱨᱮᱭᱟᱜ ᱠᱤᱪᱷᱩ ᱦᱟᱹᱴᱤᱧ) ᱛᱟᱦᱮᱸ ᱠᱟᱱᱟ᱾ ᱱᱚᱶᱟ ᱢᱟᱨᱟᱝ ᱴᱚᱴᱷᱟ ᱫᱚ ᱢᱚᱞᱞᱚᱵᱷᱩᱢ ᱠᱚ ᱢᱮᱛᱟᱜ ᱠᱟᱱ ᱛᱟᱦᱮᱸᱫ᱾ ᱨᱟᱡᱽᱵᱚᱝᱥᱚ ᱥᱟᱶ ᱡᱚᱯᱚᱲᱟᱣ ᱫᱚᱦᱚ ᱠᱟᱛᱮ ᱱᱚᱶᱟ ᱟᱹᱛᱩ ᱨᱮᱭᱟᱜ ᱧᱩᱛᱩᱢ ᱢᱟᱬᱟᱝ ᱨᱮ 'ᱢᱚᱞᱞᱚ' ᱞᱟᱜᱟᱣ ᱠᱟᱛᱮ ᱫᱚᱦᱚ ᱞᱮᱱᱟ ᱯᱟᱞᱮᱱᱚᱜ᱾[᱑]
᱑᱘᱕᱗ ᱥᱮᱨᱢᱟ ᱥᱮᱫ, ᱵᱟᱝᱞᱟ ᱨᱤᱱᱤᱡ ᱢᱤᱫ ᱢᱟᱨᱟᱝ ᱫᱷᱚᱨᱚᱢ ᱜᱩᱨᱩ, ᱥᱣᱟᱢᱤ ᱵᱟᱢᱫᱮᱵᱽ (ᱥᱮ ᱥᱟᱫᱷᱚᱠ ᱵᱟᱢᱟᱠᱷᱮᱯᱟ) ᱫᱚ ᱱᱚᱸᱰᱮ ᱱᱟᱭᱠᱮ ᱵᱮᱱᱟᱣᱚᱜ ᱮ ᱦᱮᱡ ᱞᱮᱱᱟ ᱢᱮᱱᱠᱷᱟᱱ ᱵᱟᱝ ᱮ ᱫᱟᱲᱮᱭᱟᱫᱼᱟ ᱪᱮᱫᱟᱜ ᱥᱮ ᱩᱱᱤ ᱫᱚ ᱥᱚᱸᱥᱠᱨᱤᱛ ᱢᱚᱱᱛᱨᱚ ᱵᱟᱭ ᱫᱤᱥᱟᱹ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱫ᱾ ᱩᱱᱤ ᱫᱚ ᱯᱩᱡᱟᱹ ᱞᱟᱹᱜᱤᱫ ᱫᱟᱠᱟ ᱪᱚᱸᱫᱟ ᱠᱟᱹᱢᱤ ᱨᱮᱠᱚ ᱞᱟᱜᱟᱣ ᱠᱮᱫᱮᱭᱟ᱾ ᱢᱟᱞᱩᱴᱤ ᱨᱮ ᱟᱡᱟᱜ ᱑᱘-ᱪᱟᱸᱫᱚ ᱛᱟᱦᱮᱸᱱ ᱚᱠᱛᱚ ᱨᱮ, ᱵᱟᱢᱟᱠᱷᱮᱯᱟ ᱫᱚ ᱟᱡᱟᱜ ᱡᱟᱹᱥᱛᱤ ᱚᱠᱛᱚ ᱢᱳᱣᱞᱤᱠᱠᱷᱟ ᱢᱚᱱᱫᱤᱨ ᱨᱮᱜᱮᱭ ᱠᱷᱟᱸᱰᱟᱣᱮᱫ ᱛᱟᱦᱮᱸᱫ᱾ ᱱᱚᱸᱰᱮ ᱜᱮ ᱩᱱᱤ ᱫᱚ ᱯᱩᱭᱞᱩ ᱟᱹᱥᱤᱨᱵᱟᱫᱽ ᱮ ᱧᱟᱢ ᱞᱮᱫᱼᱟ᱾ ᱤᱱᱟᱹ ᱛᱟᱭᱚᱢ, ᱩᱱᱤ ᱫᱚ ᱛᱟᱨᱟᱯᱤᱴᱷ ᱛᱮᱭ ᱥᱮᱱ ᱮᱱᱟ᱾ ᱟᱡᱟᱜ ᱛᱨᱤᱥᱩᱞ ᱫᱚ ᱱᱤᱛ ᱦᱚᱸ ᱢᱟᱞᱩᱴᱤ ᱨᱮ ᱨᱩᱠᱷᱤᱭᱟᱹ ᱢᱮᱱᱟᱜᱼᱟ᱾
ᱢᱮᱱᱠᱷᱟᱱ ᱢᱟᱞᱩᱴᱤ ᱫᱚ, ᱯᱟᱞᱮᱱ ᱱᱚᱶᱟ ᱧᱩᱛᱩᱢ ᱛᱮᱫᱚ ᱵᱟᱝ, ᱵᱟᱡᱽ ᱵᱚᱥᱚᱱᱛᱚ ᱨᱟᱡᱽᱵᱚᱝᱥᱚ ᱨᱮᱭᱟᱜ ᱠᱷᱟᱡᱽᱱᱟ-ᱪᱷᱟᱲ ᱨᱟᱡᱽᱜᱟᱲ ᱦᱩᱭᱩᱜ ᱠᱷᱚᱱ ᱟᱹᱰᱤ ᱢᱟᱬᱟᱝ ᱨᱮᱜᱮ ᱛᱟᱦᱮᱸ ᱠᱟᱱᱟ᱾ ᱢᱤᱫ ᱚᱠᱛᱚ ᱱᱚᱶᱟ ᱫᱚ ᱥᱮᱪᱮᱫ ᱨᱮᱭᱟᱜ ᱢᱤᱫ ᱢᱟᱨᱟᱝ ᱴᱷᱟᱶ ᱞᱮᱠᱟᱛᱮ ᱢᱟᱱᱚᱛ ᱛᱟᱦᱮᱸ ᱠᱟᱱᱟ᱾ ᱢᱟᱞᱩᱴᱤ ᱨᱮᱭᱟᱜ ᱠᱟᱛᱷᱟ — ᱡᱟᱦᱟᱸ ᱫᱚ ᱢᱟᱨᱮ ᱚᱠᱛᱚ ᱨᱮ ᱜᱩᱯᱛᱚ ᱠᱟᱥᱤ ᱧᱩᱛᱩᱢ ᱛᱮ ᱵᱟᱰᱟᱭᱚᱜ ᱠᱟᱱ ᱛᱟᱦᱮᱸᱫ — ᱥᱩᱝᱜᱚ ᱨᱟᱡᱽᱵᱚᱝᱥᱚ (᱑᱘᱕ ᱵᱤ.ᱥᱤ - ᱗᱕ ᱵᱤ.ᱥᱤ) ᱨᱮᱭᱟᱜ ᱮᱛᱚᱦᱚᱵ ᱥᱮᱫ ᱧᱟᱢᱚᱜᱼᱟ, ᱡᱟᱦᱟᱸᱭᱤᱡ ᱵᱩᱱᱤᱭᱟᱹᱫᱤᱭᱟᱹ ᱫᱚ ᱯᱩᱥᱭᱟᱢᱤᱛᱨᱚ ᱥᱩᱝᱜᱚ (᱑᱘᱕ ᱵᱤ.ᱥᱤ - ᱑᱕᱑ ᱵᱤ.ᱥᱤ) ᱮ ᱛᱟᱦᱮᱸ ᱠᱟᱱᱟ᱾ ᱢᱟᱞᱩᱴᱤ ᱨᱮᱜᱮ ᱯᱟᱴᱞᱤᱯᱩᱛᱨᱚ ᱨᱤᱱᱤᱡ ᱨᱟᱡᱟ ᱫᱚ ᱚᱥᱣᱚᱢᱮᱫᱷ ᱡᱚᱜᱽᱭᱚ ᱮ ᱠᱚᱨᱟᱣ ᱞᱮᱫᱼᱟ᱾ ᱛᱟᱭᱚᱢ ᱛᱮ ᱵᱚᱡᱽᱨᱚᱡᱟᱱᱤ ᱵᱩᱫᱫᱷᱤᱥᱴ, ᱛᱟᱱᱛᱨᱤᱠ ᱟᱹᱨᱤᱪᱟᱹᱞᱤ ᱢᱟᱱᱟᱣ ᱦᱚᱲ ᱠᱚ, ᱱᱚᱸᱰᱮ ᱠᱚ ᱜᱤᱨᱟᱹᱵᱟᱹᱥᱤ ᱞᱮᱱᱟ᱾ ᱚᱱᱟᱛᱮ, ᱢᱳᱣᱞᱤᱠᱠᱷᱟ ᱟᱭᱳ ᱜᱮ ᱢᱟᱞᱩᱴᱤ ᱨᱮ ᱧᱟᱢ ᱟᱠᱟᱱ ᱡᱚᱛᱚ ᱠᱷᱚᱱ ᱢᱟᱨᱮ ᱢᱩᱨᱛᱤ ᱠᱟᱱᱟᱭ᱾
ᱞᱟᱹᱭᱚᱜᱼᱟ ᱡᱮ ᱟᱫᱤ ᱥᱚᱝᱠᱚᱨᱟᱪᱟᱨᱭᱚ ᱫᱚ ᱵᱟᱨᱟᱬᱟᱥᱤ ᱥᱮᱱᱚᱜ ᱦᱚᱨ ᱨᱮ, ᱢᱟᱞᱩᱴᱤ ᱨᱮᱭ ᱡᱤᱨᱟᱹᱣ ᱞᱮᱱᱟ᱾ ᱟᱨ ᱱᱚᱸᱰᱮ ᱜᱮ ᱩᱱᱤ ᱫᱚ ᱵᱩᱫᱫᱷᱚ ᱫᱷᱚᱨᱚᱢ ᱵᱤᱨᱩᱫᱽ ᱨᱮ ᱟᱡᱟᱜ ᱢᱤᱥᱚᱱ ᱮ ᱮᱦᱚᱵ ᱞᱮᱫᱼᱟ᱾ ᱠᱤᱪᱷᱩ ᱱᱟᱜᱟᱢᱤᱭᱟᱹ ᱠᱚ ᱞᱟᱹᱭᱟ ᱡᱮ ᱢᱟᱞᱩᱴᱤ ᱫᱚ ᱯᱩᱭᱞᱩ ᱴᱷᱟᱶ ᱠᱟᱱᱟ ᱡᱟᱦᱟᱸ ᱨᱮ ᱵᱮᱫᱤᱠ ᱦᱩᱞᱥᱟᱹᱭ ᱮᱦᱚᱵ ᱞᱮᱱᱟ᱾ ᱵᱟᱨᱟᱬᱟᱥᱤ ᱨᱮᱭᱟᱜ ᱥᱩᱢᱮᱨᱩ ᱢᱚᱴᱷ ᱨᱤᱱᱤᱡ ᱫᱟᱱᱰᱤᱥᱣᱟᱢᱤ ᱫᱚ ᱟᱫᱤ ᱥᱚᱝᱠᱚᱨᱟᱪᱟᱨᱭᱚ ᱦᱚᱛᱮᱛᱮ ᱮᱦᱚᱵ ᱞᱮᱱ ᱟᱹᱨᱤᱪᱟᱹᱞᱤ ᱞᱮᱠᱟᱛᱮ ᱱᱤᱛ ᱦᱚᱸ ᱥᱮᱨᱢᱟ ᱨᱮ ᱢᱤᱫ ᱫᱷᱟᱣ ᱱᱚᱸᱰᱮᱭ ᱦᱤᱡᱩᱜᱼᱟ᱾
ᱢᱟᱨᱮ-ᱱᱟᱜᱟᱢ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱪᱤᱞᱟ ᱜᱟᱰᱟ ᱨᱮ ᱧᱟᱢ ᱟᱠᱟᱱ ᱠᱤᱪᱷᱩ ᱢᱟᱨᱮ-ᱱᱟᱜᱟᱢ ᱨᱮᱭᱟᱜ ᱫᱷᱤᱨᱤ ᱦᱟᱹᱛᱤᱭᱟᱹᱨ ᱠᱚ ᱯᱨᱚᱢᱟᱱᱟ ᱡᱮ ᱢᱟᱞᱩᱴᱤ ᱨᱮᱫᱚ ᱟᱵᱚ ᱨᱮᱱ ᱢᱟᱨᱮ-ᱦᱟᱯᱲᱟᱢ ᱠᱚᱠᱚ ᱛᱟᱦᱮᱸ ᱠᱟᱱᱟ, ᱡᱩᱫᱤᱦᱚᱸ ᱱᱚᱶᱟ ᱴᱚᱴᱷᱟ ᱨᱮᱫᱚ ᱛᱤᱥ ᱦᱚᱸ ᱞᱟ ᱵᱟᱝ ᱦᱩᱭ ᱟᱠᱟᱱᱟ᱾
ᱪᱤᱞᱟ ᱜᱟᱰᱟ ᱫᱚ ᱟᱹᱛᱩ ᱨᱮᱭᱟᱜ ᱫᱷᱟᱨᱮ ᱛᱮ ᱞᱤᱸᱜᱤᱱ ᱠᱟᱱᱟ ᱟᱨ ᱡᱷᱟᱨᱠᱷᱚᱸᱰ ᱟᱨ ᱯᱚᱪᱷᱤᱢ ᱵᱟᱝᱞᱟ ᱨᱮᱭᱟᱜ ᱥᱤᱢᱟᱹᱭ ᱵᱮᱱᱟᱣᱟ᱾ ᱱᱚᱶᱟ ᱜᱟᱰᱟ ᱫᱚ ᱫᱩᱢᱠᱟᱹ ᱦᱚᱱᱚᱛ ᱨᱮᱭᱟᱜ ᱢᱤᱫ ᱩᱥᱩᱞ ᱴᱷᱟᱶ ᱵᱟᱸᱥᱯᱟᱦᱟᱲᱤ ᱠᱷᱚᱱ ᱩᱰᱩᱠ ᱟᱠᱟᱱᱟ ᱟᱨ ᱵᱟᱝᱞᱟ ᱨᱮ ᱫᱣᱟᱨᱠᱟ ᱜᱟᱰᱟ ᱥᱟᱶ ᱢᱮᱥᱟ ᱟᱠᱟᱱᱟ᱾ ᱜᱟᱰᱟ ᱜᱤᱛᱤᱞ ᱨᱮ ᱟᱭᱢᱟ ᱴᱷᱟᱶ ᱨᱮ ᱫᱷᱤᱨᱤ ᱨᱮᱭᱟᱜ ᱦᱟᱹᱛᱤᱭᱟᱹᱨ ᱟᱨ ᱢᱟᱨᱮ ᱚᱥᱛᱨᱚ ᱠᱚ ᱧᱟᱢᱚᱜᱼᱟ᱾
ᱱᱚᱶᱟ ᱴᱚᱴᱷᱟ ᱨᱮ ᱧᱟᱢ ᱟᱠᱟᱱ ᱫᱷᱤᱨᱤ-ᱦᱟᱹᱛᱤᱭᱟᱹᱨ ᱠᱚᱫᱚ ᱦᱩᱭᱩᱜ ᱠᱟᱱᱟ ᱛᱤ-ᱴᱟᱝᱜᱟ, ᱨᱟᱨᱟᱜᱟᱜ ᱟᱨ ᱵᱞᱮᱰ (ᱵᱟᱹᱞᱤ)᱾ ᱜᱟᱰᱟ ᱜᱤᱛᱤᱞ ᱨᱮ ᱟᱭᱢᱟ ᱩᱪᱷᱤᱫ ᱡᱤᱱᱤᱥ ᱠᱚ ᱦᱚᱸ ᱜᱚᱴᱟ ᱯᱟᱥᱱᱟᱣ ᱟᱠᱟᱱᱟ᱾ ᱱᱚᱶᱟ ᱦᱟᱹᱛᱤᱭᱟᱹᱨ ᱠᱚᱫᱚ ᱯᱩᱭᱞᱩ ᱫᱷᱤᱨᱤ ᱡᱩᱜᱽ ᱠᱷᱚᱱ ᱛᱟᱞᱟ ᱫᱷᱤᱨᱤ ᱡᱩᱜᱽ ᱨᱮᱭᱟᱜ ᱯᱟᱨᱚᱢᱚᱜ ᱚᱠᱛᱚ ᱨᱮᱭᱟᱜ ᱠᱟᱱᱟ᱾ ᱠᱟᱹᱢᱤᱭᱟᱱ ᱫᱷᱟᱨ ᱠᱚᱫᱚ ᱯᱟᱥᱱᱟᱣ ᱟᱠᱟᱱᱟ ᱟᱨ ᱱᱤᱛ ᱦᱚᱸ ᱞᱟᱥᱮᱨ ᱜᱮᱭᱟ᱾ ᱱᱤᱭᱳᱞᱤᱛᱷᱤᱠ ᱥᱮ ᱪᱟᱞᱠᱳᱞᱤᱛᱷᱤᱠ ᱨᱮᱭᱟᱜ ᱱᱚᱢᱩᱱᱟ ᱠᱚᱫᱚ ᱱᱚᱶᱟ ᱟᱹᱛᱩ ᱥᱮ ᱟᱥᱮᱯᱟᱥᱮ ᱨᱮ ᱱᱤᱛ ᱦᱚᱸ ᱵᱟᱝ ᱧᱟᱢ ᱟᱠᱟᱱᱟ᱾ ᱵᱤᱥᱣᱚ-ᱵᱷᱟᱨᱚᱛᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱤᱱᱤᱡ ᱟᱨᱠᱤᱭᱳᱞᱚᱡᱤᱥᱴ ᱯᱨᱚᱯᱷᱮᱥᱟᱨ ᱥᱩᱵᱽᱨᱚᱛᱚ ᱪᱚᱠᱨᱚᱵᱚᱨᱛᱤ ᱞᱮᱠᱟᱛᱮ, ᱱᱚᱶᱟ ᱦᱟᱹᱛᱤᱭᱟᱹᱨ ᱠᱚᱫᱚ ᱯᱮᱞᱤᱭᱳᱞᱤᱛᱷᱤᱠ ᱚᱠᱛᱚ ᱨᱮᱭᱟᱜ ᱠᱟᱱᱟ᱾
ᱯᱨᱚᱯᱷᱮᱥᱟᱨ ᱥᱩᱵᱽᱨᱚᱛᱚ ᱪᱚᱠᱨᱚᱵᱚᱨᱛᱤ ᱱᱚᱶᱟ ᱦᱟᱹᱛᱤᱭᱟᱹᱨ ᱠᱚᱫᱚ ᱵᱟᱨᱭᱟ ᱢᱟᱨᱟᱝ ᱛᱷᱚᱠ ᱨᱮᱭ ᱦᱟᱹᱴᱤᱧ ᱟᱠᱟᱫᱼᱟ ᱟᱪᱤᱣᱞᱤᱭᱟᱱ ᱟᱨ ᱢᱤᱰᱤᱞ ᱯᱮᱞᱤᱭᱳᱞᱤᱛᱷᱤᱠ᱾ ᱠᱤᱪᱷᱩ ᱢᱮᱥᱳᱞᱤᱛᱷᱤᱠ ᱡᱤᱱᱤᱥ ᱠᱚ ᱦᱚᱸ ᱱᱚᱶᱟ ᱴᱷᱟᱶ ᱨᱮ ᱧᱟᱢᱚᱜᱼᱟ᱾ ᱯᱨᱚᱯᱷᱮᱥᱟᱨ ᱪᱚᱠᱨᱚᱵᱚᱨᱛᱤ ᱪᱤᱞᱟ ᱠᱷᱚᱱ ᱧᱟᱢ ᱟᱠᱟᱱ ᱟᱪᱤᱣᱞᱤᱭᱟᱱ ᱡᱤᱱᱤᱥ ᱠᱚ, ᱚᱱᱟ ᱴᱷᱟᱶ ᱠᱷᱚᱱ ᱛᱩᱢᱟᱹᱞ ᱟᱠᱟᱱ ᱚᱱᱠᱟᱱ ᱦᱟᱹᱛᱤᱭᱟᱹᱨ ᱨᱮᱭᱟᱜ ᱦᱟᱹᱴᱤᱧ ᱟᱨ ᱚᱱᱟ ᱦᱟᱹᱛᱤᱭᱟᱹᱨ ᱵᱮᱱᱟᱣ ᱞᱟᱹᱜᱤᱫ ᱵᱮᱵᱷᱟᱨ ᱟᱠᱟᱱ ᱵᱮᱨᱮᱞ ᱡᱤᱱᱤᱥ ᱠᱚ ᱵᱟᱵᱚᱛ ᱮ ᱵᱤᱥᱛᱟᱹᱨ ᱟᱠᱟᱫᱼᱟ᱾
ᱵᱤᱨᱵᱷᱩᱢ – ᱡᱷᱟᱨᱠᱷᱚᱸᱰ ᱥᱤᱢᱟᱹ ᱨᱮ ᱞᱤᱸᱜᱤᱱ ᱠᱟᱱ ᱜᱟᱰᱟ ᱪᱤᱞᱟ ᱨᱮᱭᱟᱜ ᱢᱟᱞᱩᱴᱤ ᱥᱚᱫᱚᱨᱜᱷᱟᱴ ᱨᱮ ᱟᱪᱤᱣᱞᱤᱭᱟᱱ ᱧᱟᱢ ᱟᱠᱟᱱᱟ᱾ ᱯᱮᱭᱟ ᱴᱚᱴᱷᱟ ᱠᱷᱚᱱ ᱧᱟᱢ ᱟᱠᱟᱱ ᱟᱪᱤᱣᱞᱤᱭᱟᱱ ᱡᱤᱱᱤᱥ ᱡᱟᱦᱟᱸ ᱨᱮ ᱢᱤᱫᱴᱟᱹᱝ ᱫᱚ ᱯᱷᱳᱥᱤᱞᱤᱯᱷᱮᱨᱚᱥ ᱠᱟᱱᱟ ᱚᱱᱟ ᱠᱚᱨᱮ ᱥᱮᱞᱮᱫ ᱢᱮᱱᱟᱜᱼᱟ ᱛᱤ-ᱴᱟᱝᱜᱟ, ᱠᱞᱤᱵᱷᱟᱨ, ᱪᱳᱯᱟᱨ, ᱥᱠᱨᱮᱯᱟᱨ ᱟᱨ ᱵᱮᱠᱟᱨ ᱩᱪᱷᱤᱫ ᱠᱚ, ᱯᱷᱞᱮᱠᱥ, ᱠᱳᱨ ᱟᱨ ᱪᱤᱯᱥ ᱠᱚᱫᱚ ᱵᱮᱨᱮᱞ ᱡᱤᱱᱤᱥ — ᱴᱨᱮᱯᱥ, ᱵᱟᱥᱟᱞᱴᱥ, ᱠᱣᱟᱴᱡᱟᱭᱤᱴᱥ, ᱪᱟᱨᱴᱥ, ᱡᱟᱥᱯᱟᱨ ᱛᱮ ᱵᱮᱱᱟᱣ ᱟᱠᱟᱱᱟ᱾ ᱢᱟᱞᱩᱴᱤ ᱥᱚᱫᱚᱨᱜᱷᱟᱴ ᱟᱪᱤᱣᱞᱤᱭᱟᱱ ᱴᱷᱟᱶ ᱨᱮᱭᱟᱜ ᱡᱟᱣᱨᱟ ᱨᱮ ᱮᱴᱟᱜ ᱟᱭᱢᱟ ᱦᱟᱹᱛᱤᱭᱟᱹᱨ ᱠᱚᱨᱮᱱᱟᱜ ᱟᱹᱰᱤ ᱵᱟᱹᱲᱛᱤ ᱧᱮᱞᱚᱜᱼᱟ ᱡᱮᱞᱮᱠᱟ ᱨᱤᱴᱚᱪᱰ ᱯᱷᱞᱮᱠᱥ, ᱥᱟᱭᱤᱰ ᱥᱠᱨᱮᱯᱟᱨ, ᱮᱱᱰ ᱥᱠᱨᱮᱯᱟᱨ, ᱯᱚᱭᱮᱱᱴ ᱵᱚᱨᱚᱨ ᱟᱨ ᱮᱴᱟᱜ ᱦᱟᱞᱠᱟ ᱠᱟᱹᱢᱤ ᱨᱮᱭᱟᱜ ᱦᱟᱹᱛᱤᱭᱟᱹᱨ ᱠᱚ᱾
ᱦᱟᱹᱛᱤᱭᱟᱹᱨ ᱢᱮᱱᱟᱜ ᱴᱚᱴᱷᱟ ᱫᱚ ᱥᱚᱫᱚᱨᱜᱷᱟᱴ ᱧᱩᱛᱩᱢᱟᱱ ᱢᱤᱫ ᱴᱷᱟᱶ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱪᱮᱛᱟᱱ ᱥᱮᱫ ᱥᱤᱨᱟᱞᱤ ᱧᱩᱛᱩᱢᱟᱱ ᱴᱷᱟᱶ ᱫᱷᱟᱹᱵᱤᱡ ᱯᱟᱥᱱᱟᱣ ᱟᱠᱟᱱᱟ᱾ ᱱᱚᱶᱟ ᱵᱟᱨᱭᱟ ᱴᱷᱟᱶ ᱛᱟᱞᱟ ᱨᱮᱭᱟᱜ ᱥᱟᱺᱜᱤᱧ ᱫᱚ ᱥᱩᱢᱩᱝ ᱢᱤᱫ ᱠᱤᱞᱚᱢᱤᱴᱚᱨ ᱠᱟᱱᱟ᱾ ᱢᱟᱞᱩᱴᱤ ᱟᱹᱛᱩ ᱵᱷᱤᱛᱨᱤ ᱨᱮ ᱛᱟᱭᱚᱢ ᱛᱟᱞᱟ ᱡᱩᱜᱽ ᱨᱮᱭᱟᱜ ᱟᱨᱠᱤᱭᱳᱞᱚᱡᱤᱠᱟᱞ ᱥᱟᱨᱮᱡ ᱠᱚ ᱟᱨ ᱟᱹᱛᱩ ᱵᱟᱦᱨᱮ ᱠᱷᱚᱱ ᱢᱟᱨᱮ-ᱱᱟᱜᱟᱢ ᱨᱮᱭᱟᱜ ᱫᱷᱤᱨᱤ ᱦᱟᱹᱛᱤᱭᱟᱹᱨ ᱠᱚ ᱧᱟᱢᱚᱜ ᱠᱷᱟᱹᱛᱤᱨ ᱱᱚᱶᱟ ᱟᱹᱛᱩ ᱫᱚ ᱟᱨᱠᱤᱭᱳᱞᱚᱡᱤ ᱨᱮᱭᱟᱜ ᱢᱤᱫ ᱠᱷᱚᱡᱟᱱᱟ ᱞᱮᱠᱟᱛᱮ ᱵᱮᱱᱟᱣ ᱟᱠᱟᱱᱟ᱾
ᱢᱟᱞᱩᱴᱤ ᱨᱮᱭᱟᱜ ᱢᱚᱱᱫᱤᱨ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱛᱮᱦᱮᱧ, ᱢᱟᱞᱩᱴᱤ ᱟᱹᱛᱩ ᱨᱮᱭᱟᱜ ᱢᱤᱫ ᱢᱩᱬᱩᱛ ᱠᱟᱹᱢᱤ ᱫᱚ ᱱᱚᱶᱟ ᱨᱮᱭᱟᱜ ᱗᱒ ᱜᱚᱴᱟᱝ ᱢᱟᱨᱮ ᱢᱚᱱᱫᱤᱨ ᱨᱮᱭᱟᱜ ᱫᱮᱠᱷᱵᱷᱟᱞ ᱠᱟᱱᱟ᱾ ᱞᱟᱹᱭᱚᱜᱼᱟ ᱡᱮ ᱱᱟᱱᱠᱟᱨ ᱯᱚᱱᱚᱛ ᱨᱤᱱᱤᱡ ᱨᱟᱡᱟ ᱫᱚ ᱟᱥᱚᱞ ᱨᱮ ᱑᱐᱘ ᱜᱚᱴᱟᱝ ᱢᱚᱱᱫᱤᱨ ᱮ ᱵᱮᱱᱟᱣ ᱞᱮᱫᱼᱟ, ᱢᱮᱱᱠᱷᱟᱱ ᱛᱟᱭᱚᱢ ᱫᱟᱨᱟᱢ ᱯᱤᱲᱦᱤ ᱠᱚᱫᱚ ᱱᱩᱱᱟᱹᱜ ᱟᱭᱢᱟ ᱢᱚᱱᱫᱤᱨ ᱨᱮᱭᱟᱜ ᱫᱮᱠᱷᱵᱷᱟᱞ ᱵᱟᱝ ᱠᱚ ᱫᱟᱲᱮᱭᱟᱫᱼᱟ, ᱟᱨ ᱡᱟᱹᱥᱛᱤ ᱜᱟᱱ ᱜᱮ ᱵᱤᱱ-ᱫᱮᱠᱷᱵᱷᱟᱞ ᱛᱮ ᱛᱟᱦᱮᱸ ᱮᱱᱟ᱾ ᱚᱠᱛᱚ ᱯᱟᱨᱚᱢᱚᱜ ᱥᱟᱶᱛᱮ, ᱓᱖ ᱜᱚᱴᱟᱝ ᱢᱚᱱᱫᱤᱨ ᱫᱚ ᱠᱷᱟᱨᱟᱯ ᱤᱫᱤᱭᱮᱱᱟ ᱟᱨ ᱢᱩᱪᱟᱹᱫ ᱨᱮ ᱯᱩᱨᱟᱹᱯᱩᱨᱤ ᱫᱷᱟᱥᱟᱣ ᱮᱱᱟ᱾
᱒᱐᱑᱐ ᱥᱮᱨᱢᱟ ᱨᱮᱭᱟᱜ ᱥᱮᱵᱷᱤᱝ ᱟᱣᱟᱨ ᱵᱷᱮᱱᱤᱥᱤᱝ ᱦᱮᱨᱤᱴᱮᱡᱽ ᱧᱩᱛᱩᱢᱟᱱ ᱢᱤᱫ ᱨᱤᱯᱳᱨᱴ ᱨᱮ, ᱜᱞᱳᱵᱟᱞ ᱦᱮᱨᱤᱴᱮᱡᱽ ᱯᱷᱟᱱᱰ ᱫᱚ ᱢᱟᱞᱩᱴᱤ ᱨᱮᱭᱟᱜ ᱢᱚᱱᱫᱤᱨ ᱠᱚ ᱫᱚ ᱡᱮᱜᱮᱛ ᱨᱮᱭᱟᱜ ᱑᱒ ᱜᱚᱴᱟᱝ ᱚᱱᱠᱟᱱ ᱴᱷᱟᱶ ᱠᱚ ᱢᱩᱫᱽ ᱨᱮ ᱢᱤᱫᱴᱟᱹᱝ ᱢᱮᱱᱛᱮᱭ ᱪᱤᱱᱦᱟᱹᱯ ᱟᱠᱟᱫᱼᱟ ᱡᱟᱦᱟᱸ ᱫᱚ ᱟᱨ ᱵᱟᱝ ᱵᱮᱱᱟᱣ ᱨᱩᱣᱟᱹᱲᱚᱜ ᱞᱮᱠᱟᱱ ᱠᱷᱚᱛᱤ ᱟᱨ ᱱᱚᱥᱴᱚ ᱨᱮᱭᱟᱜ ᱟᱹᱰᱤ ᱥᱩᱨ ᱨᱮ ("ᱚᱱ ᱫᱟ ᱵᱷᱟᱨᱡᱽ") ᱢᱮᱱᱟᱜᱼᱟ, ᱡᱟᱦᱟᱸ ᱨᱮᱭᱟᱜ ᱢᱩᱬᱩᱛ ᱠᱟᱨᱚᱬ ᱞᱮᱠᱟᱛᱮ ᱵᱮᱥ ᱵᱮᱵᱚᱥᱛᱟ ᱵᱟᱝ ᱛᱟᱦᱮᱸᱱ ᱮ ᱞᱟᱹᱭ ᱟᱠᱟᱫᱼᱟ᱾
ᱢᱚᱱᱫᱤᱨ ᱠᱚᱨᱮᱱᱟᱜ ᱵᱮᱱᱟᱣ ᱥᱚᱭᱞᱤ ᱵᱟᱵᱚᱛ ᱛᱮ, ᱱᱚᱶᱟ ᱧᱮᱞᱚᱜᱼᱟ ᱡᱮ ᱱᱤᱛᱚᱜ ᱢᱮᱱᱟᱜ ᱢᱚᱱᱫᱤᱨ ᱠᱚᱨᱮ ᱱᱟᱜᱟᱨᱟ, ᱵᱮᱥᱟᱨ ᱥᱮ ᱫᱨᱟᱵᱤᱲ ᱞᱮᱠᱟᱱ ᱡᱟᱦᱟᱸᱱᱟᱜ ᱢᱤᱫ ᱵᱤᱥᱮᱥ ᱥᱚᱭᱞᱤ ᱫᱚ ᱵᱟᱝ ᱯᱟᱸᱡᱟ ᱟᱠᱟᱱᱟ᱾ ᱵᱟᱝᱞᱟ ᱠᱷᱚᱱ ᱦᱮᱡ ᱟᱠᱟᱱ ᱵᱤᱥᱮᱥ ᱠᱟᱹᱨᱤᱜᱚᱞ ᱠᱚ ᱱᱚᱶᱟ ᱢᱚᱱᱫᱤᱨ ᱠᱚ ᱵᱮᱱᱟᱣ ᱡᱚᱠᱷᱮᱡ ᱟᱭᱢᱟ ᱞᱮᱠᱟᱱ ᱰᱤᱡᱟᱭᱤᱱ ᱠᱚ ᱮᱢ ᱞᱮᱫᱼᱟ᱾ ᱩᱱᱠᱩᱣᱟᱜ ᱰᱤᱡᱟᱭᱤᱱ ᱠᱚᱫᱚ ᱢᱚᱬᱮ ᱜᱚᱴᱟᱝ ᱛᱷᱚᱠ ᱨᱮ ᱦᱟᱹᱴᱤᱧ ᱟᱠᱟᱱᱟ᱾[᱑]
ᱢᱟᱞᱩᱴᱤ ᱴᱷᱟᱶ ᱨᱮᱭᱟᱜ ᱢᱩᱬᱩᱛ ᱢᱚᱱᱫᱤᱨ ᱫᱚ ᱢᱟ ᱢᱳᱣᱞᱤᱠᱠᱷᱟ ᱢᱚᱱᱫᱤᱨ ᱠᱟᱱᱟ, ᱡᱟᱦᱟᱸᱭ ᱫᱚ ᱵᱟᱡᱽ ᱵᱚᱥᱚᱱᱛᱚ ᱨᱟᱭ ᱨᱟᱡᱽ ᱜᱷᱟᱨᱚᱸᱡᱽ ᱨᱤᱱᱤᱡ ᱢᱩᱬᱩᱛ ᱵᱚᱸᱜᱟ ᱟᱨ ᱢᱟᱞᱩᱴᱤ ᱨᱤᱱᱤᱡ ᱨᱩᱠᱷᱤᱭᱟᱹ ᱫᱮᱵᱤ ᱠᱟᱱᱟᱭ᱾ ᱟᱹᱰᱤ ᱦᱟᱦᱟᱲᱟ ᱠᱟᱛᱷᱟ ᱫᱚ ᱱᱚᱶᱟ ᱠᱟᱱᱟ ᱡᱮ ᱱᱩᱭ ᱫᱮᱵᱤ ᱫᱚ ᱦᱤᱱᱫᱩ ᱫᱷᱚᱨᱚᱢ ᱯᱩᱛᱷᱤ ᱨᱮᱫᱚ ᱵᱟᱭ ᱧᱟᱢᱚᱜᱼᱟ ᱢᱮᱱᱠᱷᱟᱱ ᱵᱚᱡᱽᱨᱚᱡᱟᱱ ᱵᱩᱫᱫᱷᱚ ᱫᱷᱚᱨᱚᱢ ᱨᱮ ᱫᱮᱵᱤ ᱯᱟᱱᱰᱳᱨᱟ ᱞᱮᱠᱟᱛᱮᱭ ᱧᱟᱢᱚᱜᱼᱟ᱾ ᱟᱹᱥᱩᱞ ᱟᱹᱥᱩᱞ ᱛᱮ ᱱᱚᱶᱟ ᱴᱚᱴᱷᱟ ᱨᱮ ᱵᱩᱫᱫᱷᱚ ᱫᱷᱚᱨᱚᱢ ᱨᱮᱭᱟᱜ ᱯᱨᱚᱵᱷᱟᱵᱽ ᱠᱚᱢ ᱤᱫᱤᱭᱮᱱᱟ ᱟᱨ ᱩᱱᱤ ᱫᱚ ᱦᱤᱱᱫᱩ ᱛᱚᱱᱛᱨᱚ ᱨᱤᱱᱤᱡ ᱢᱤᱫ ᱫᱮᱵᱤᱭ ᱵᱮᱱᱟᱣ ᱮᱱᱟ᱾
ᱵᱟᱨᱦᱮ ᱡᱚᱱᱚᱲ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- 1 2 3 "Maluti". maluti.org. Archived from the original on 2010-01-15. Retrieved April 10, 2017.
- ↑ "ᱢᱟᱞᱩᱴᱤ ᱟᱹᱛᱩ ᱨᱮᱱ ᱦᱚᱲ ᱮᱞ - ᱥᱤᱠᱟᱹᱨᱤᱯᱟᱲᱟ - ᱫᱩᱢᱠᱟᱹ, ᱡᱷᱟᱨᱠᱷᱚᱸᱰ".
- ↑ "Adi Shankara, his life & Mutts". 17 July 2008.
- Articles with short description
- Short description is different from Wikidata
- Pages using infobox settlement with bad settlement type
- Pages using infobox mapframe without shape links in Wikidata
- ᱤᱱᱯᱷᱳᱵᱚᱠᱥ ᱥᱮᱴᱮᱞᱢᱮᱱᱴ ᱢᱮᱯ ᱵᱟᱹᱱᱩᱜ ᱥᱟᱶ ᱵᱮᱵᱷᱟᱨᱮᱫ ᱥᱟᱦᱴᱟ ᱠᱚ
- ᱤᱱᱯᱷᱳᱵᱚᱠᱥ ᱥᱮᱴᱮᱞᱢᱮᱱᱴ ᱠᱳᱣᱚᱨᱰᱤᱱᱮᱴᱥ ᱵᱟᱹᱱᱩᱜ ᱥᱟᱶ ᱵᱮᱵᱷᱟᱨᱮᱫ ᱥᱟᱦᱴᱟ ᱠᱚ
- Pages with graphs
- Pages with disabled graphs
- Articles containing OSM location maps
- Coordinates on Wikidata
- ᱫᱩᱢᱠᱟᱹ ᱦᱚᱱᱚᱛ ᱨᱮᱱᱟᱜ ᱟᱹᱛᱩ
- ᱴᱮᱨᱟᱠᱳᱴᱟ
- Pages using the Kartographer extension