無頭騎士

呢幅廿世紀初嘅圖畫，描繪典型嘅無頭騎士形象。個英文標題嘅意思係：無頭騎士，德州嘅一個奇怪故事。

無頭騎士，粵拼：Mou4 tau4 ke4 si6，係一種傳說中嘅角色，顧名思義最大嘅特徵係其形象為：個頭甩咗落嚟嘅騎士；可以當係死靈嘅一種。講無頭騎士嘅故事自從中世紀起就存在，呢種形象一路都有零散出現喺民間故事至現代嘅虛構故事中，例如唔少人奉為早期美國文學代表之一嘅沉睡谷傳說，就有講到無頭騎士。

沉睡谷傳說

内文：沉睡谷傳說

《沉睡谷傳說》係短篇故仔，出自十九世紀早期嘅美國，由人稱美國文學之父嘅華盛頓伊榮作嘅。

《沉睡谷傳說》嘅主角係迷信、生得瘦蜢蜢嘅教書先生弈卡博·卡靈。故事開始嗰陣，卡靈佢啱啱搬到紐約州嘅沉睡谷住。沉睡谷不溜出名多鬼故同怪事，當中最出名嘅係無頭騎士，人稱一切怪異力量嘅指揮者。

弈卡博同鎮上嘅婦女有往來：佢得閒會走去幫手照顧牲畜或者斬柴，而且做得老師，佢時不時都會幫啲婦女湊細路；同時弈卡博又好沉迷啲神怪嘢，成日走去聽鎮上嘅一眾阿婆講神怪故仔，聽勻晒啲講鬼、高扁嘅傳言，而無頭騎士嘅傳說佢聽到識背bui6咁滯。

弈卡博睇中咗年輕貌美嘅卡蒂蓮娜。卡蒂蓮娜屋企好有錢，而且又係個獨生女，弈卡博諗住自己只要娶到卡蒂蓮娜就會發達。同時，弈卡博嘅情敵亞伯拉罕·凡·布魯特知佢想做乜，就連番整蠱佢。弈卡博同布魯特因此積聚咗牙齒印。有一日，弈卡博出席卡蒂蓮娜屋企嘅聚會。聚會過後，佢私底下向卡蒂蓮娜求婚，但卡蒂蓮娜拒絕。

及後，弈卡博死死哋氣噉騎住隻馬返屋企。騎騎下，佢個腦開始想像有鬼出現，然後佢就見到沼澤裏面，有個著住斗篷嘅怪人騎住隻馬企咗喺度。覺得不安嘅弈卡博想走，點知下一刻佢就見到，神秘人個頭原來係甩咗落嚟嘅，個頭放咗喺馬鞍上面。嗰一刻，弈卡博嚇到冇咗半條命，嗱嗱臨快馬加鞭想走。無頭騎士亦快馬追上嚟。弈卡博隻馬跑得夠快，佢以為自己可以擺脫無頭騎士，但無頭騎士跟住就一手攞起佢個頭，將個頭掟向弈卡博。掟中咗。然後弈卡博就墮馬。

呢幅插畫描繪《沉睡谷傳說》當中嘅經典場面： 畫面左邊嘅無頭騎士，喺度追住右邊嘅弈卡博。 呢幅插畫描繪《沉睡谷傳說》當中嘅經典場面： 畫面左邊嘅無頭騎士，喺度追住右邊嘅弈卡博。

到咗第二朝，啲人發現弈卡博隻馬喺主人屋企門前食草，但係冇人知道弈卡博去咗邊，啲人淨係喺事發現場搵到一個爛咗嘅南瓜。過咗冇幾耐，卡蒂蓮娜嫁畀布魯特。鎮上嘅阿婆就繼續講神怪故事，話弈卡博畀無頭騎士帶走咗，仲開始出現傳說，話有人目擊弈卡博嘅靈魂喺沉睡谷流連。

各地嘅傳說

睇埋：Dullahan同鬼故

無頭騎士嘅形象，遠遠唔淨只响《沉睡谷傳說》裏面出現。歐美好多地區都有傳說提起無頭騎士。

例如响古代嘅愛爾蘭，就有流傳鬼騎士Dullahan嘅傳說。鬼騎士係愛爾蘭民間傳說中以無頭騎士形象現身嘅仙子。佢嘅特徵係個頭甩咗落嚟，而且佢仲會一手攞住佢自己個頭、一路騎住隻黑色嘅馬，喺最黑暗嘅夜晚現身。好多傳說講到，鬼騎士可能會攞住條人類嘅脊骨當鞭噉用，或者佢隻馬會拉住架用人嘅骨同皮膚整嘅馬車。有啲傳說仲話，一旦鬼騎士大聲嗌某個人嘅名，嗰個人就會即刻暴斃。

講到無頭騎士嘅傳說，往往都係會提到死亡同恐懼等嘅主題，講到「遇到一啲唔屬於呢個世界嘅事物」噉嘅心情。

睇埋

• 喪屍
• 死靈
• 瘦長男
• Macabre

拎

• （英文）無頭騎士，電視橋段網講無頭騎士呢條橋kiu2。
• （英文）沉睡谷傳說，呢頁有《沉睡谷傳說》個原版英文故事。